రిషితను సింధుశర్మకు అప్పగించాలని హైకోర్టు ఆదేశం

మాతృత్వం గెలిచింది... పెద్ద కుమార్తె కోసం జస్టిస్​ నూతి రామ్మోహనరావు కోడలు సింధుశర్మ చేసిన పోరాటం ఫలించింది. రిషితను తల్లికే అప్పగించాలని ఉన్నత న్యాయస్థానం ఆదేశించింది. వారంలో ఐదు రోజులు తల్లి వద్ద, రెండు రోజులు తండ్రి వద్ద ఉండేలా తీర్పిచ్చింది. జూన్​ 4కు తదుపరి విచారణను వాయిదా వేసింది.

జస్టిస్ నూతి రామ్మోహన్ రావు కోడలు సింధుశర్మకు పెద్దకూతురును అప్పజెప్పాలని హైకోర్టు ఆదేశించింది. వారంలో ఐదు రోజులు తల్లివద్ద, రెండు రోజులు తండ్రి వద్ద రిషిత ఉండేలా తీర్పు ఇస్తూ... తదుపరి విచారణను జూన్​ 4వ తేదీకి వాయిదా వేసింది.

ఇద్దరు పిల్లలను తనకు అప్పగించాలంటూ సింధుశర్మ జూబ్లీహిల్స్​లోని జస్టిస్​ నూతి రామ్మోహనరావు ఇంటి ఎదుట మహిళా సంఘాలతో కలిసి ఆదివారం ఆందోళనకు దిగారు. చిన్నపాపను ఇచ్చినప్పటికీ పెద్దపాపను ఇవ్వడానికి ఆమె భర్త వశిష్ట అంగీకరించలేదు. భరోసా కేంద్రాన్ని ఆశ్రయించినా ఫలితం లేకపోయింది. దీనిపై సింధుశర్మ బుధవారం హైకోర్టులో హెబియస్​ కార్పస్​ పిటిషన్​ దాఖలు చేశారు. ఇవాళ ధర్మాసనం విచారణ జరిపింది. కుటుంబసభ్యులతో కాకుండా భర్తతో వేరుగా కలిసి ఉంటామని సింధుశర్మ ధర్మాసనం దృష్టికి తెచ్చారు. దీనికి ఆమె భర్త వశిష్ట అంగీకరించలేదు.

ఇదీ చదవండి : పెద్దకుమార్తె కోసం హైకోర్టులో సింధుశర్మ పిటిషన్