రాష్ట్ర ప్రభుత్వానికి మహిళల భద్రతే ప్రధాన లక్ష్యమని హోం మంత్రి మహమూద్ అలీ స్పష్టం చేశారు. సేఫ్ సిటీ ప్రాజెక్టులో భాగంగా షీ టీమ్స్ పోలీసుల కోసం ప్రభుత్వం సమకూర్చిన స్కూటీలను హైదరాబాద్లోని గోషామహల్ స్టేడియంలో ఆయన ప్రారంభించారు. షీ టీమ్స్ కోసం మొత్తం 60 స్కూటీలను ప్రభుత్వం సమకూర్చగా అందులో హైదరాబాద్ కమిషనరేట్ కోసం 27, రాచకొండ 16, సైబరాబాద్కు 17 స్కూటీలను కేటాయించారు. ఈ స్కూటీలపై షీ బృందాలు సాధారణ పౌరులుగా గస్తీ నిర్వహించనున్నారు.
పనితీరు అద్భుతం..
ప్రస్తుతం షీ టీమ్స్ అద్భుతంగా పనిచేస్తున్నాయని... ఈ స్కూటీలతో చిన్న చిన్న గల్లీల్లోకి కూడా వెళ్లి గస్తీ చేసే అవకాశం ఉంటుందని వెల్లడించారు. మహిళలు, యువతులు, చిన్నారులకు ఎదురవుతున్న సమస్యలను వెంటనే పరిష్కరించే వీలుంటుందని పేర్కొన్నారు. హైదరాబాద్ అత్యంత భద్రతతో కూడిన నగరమని ఆయన వెల్లడించారు. ఈ కార్యక్రమంలో హైదరాబాద్ సీపీ అంజనీ కుమార్, అదనపు సీపీ చౌహన్, సైబరాబాద్ షీటీమ్స్ డీసీపీ అనసూయ తదితరులు పాల్గొన్నారు.
ఇదీ చదవండి: 'ధాన్యం కొనుగోలులో ఎలాంటి ఇబ్బందులు ఉండవు'
