Red Chilli Price : తెలుగు రాష్ట్రాల నుంచి హైదరాబాద్ మలక్‌పేట వ్యవసాయ మార్కెట్ యార్డుకు మిర్చి పంట పోటెత్తుతోంది. మిరప క్రయ, విక్రయాలు జోరుగా సాగుతున్నాయి. బుధవారం మిర్చి క్వింటాల్ ఏకంగా రూ.22వేలు పలికింది. ఇది రికార్డు స్థాయి ధర కావడం విశేషం. గత రెండు మూడేళ్లలో మిర్చి పంటకు ఈ స్థాయిలో మద్దతు ధరలు దక్కలేదు. మహబూబ్‌నగర్, రంగారెడ్డి, వరంగల్, కర్నూలు, కడప, కృష్ణా, ప్రకాశం జిల్లాల నుంచి... రెండోసారి ఏరిన పంట రాకతో ధర ఒక్కసారిగా పెరిగింది.
గదేడాది రూ.13వేలే..
గతేడాది ఇదే సమయంలో ఘాటు రకం మిరప క్వింటాల్ ధర రూ.13వేలు మాత్రమే పలకగా... ఈసారి 22 వేలకు చేరింది. ఇన్నేళ్లుగా మిరప సాగుచేస్తున్నా.... ఎప్పుడూ ఇంత ధరలు చూడలేదని రైతులు అంటున్నారు. మరోవైపు పెరిగిన పెట్టుబడులు, జరిగిన నష్టం, తగ్గిన దిగుబడులతో పోల్చుకుంటే.... మార్కెట్లో లభించే ఈ ధరలతో పెద్దగా లాభం లేదని... అన్నీ తీసేస్తే చేతికి ఏం మిగలడం లేదని రైతులు అంటున్నారు.
గతంలో ఒక ఎకరాకు 30 క్వింటాలు దిగుబడి వచ్చేది.. ఇప్పుడు పది క్వింటాలే వస్తుంది. ఇప్పుడున్న ధరల వల్ల భారీ లాభాలు అయితే రావుకాని.. నష్టం మాత్రం రాదు. ధరలు పెరగడం సంతోషంగా ఉంది. -మిర్చి రైతు
ఈ ఏడాది పంటకు తెగుళ్లు భారీగా వచ్చాయి. ఎకరా పంటకు పెట్టుబడి సుమారు రూ.60 నుంచి 70 వేల వరకు అయింది. అయితే రేటు బాగుండడం సంతోషంగా ఉంది. ఇదే రేటుకు పంట ఉంటే చాలా బాగుండు. -మిర్చి రైతు
ధర ఉన్నా పంట అంతంతమాత్రమే..
మార్కెట్‌కు మిరప పోటెత్తుతుండటంతో ఒకరోజు ధర పెంచుతూ... మరో రోజు తగ్గిస్తున్నా కనీస మద్దతు ధరలకు మించి రేట్లు లభిస్తున్నాయి. గతేడాదితో పోల్చితే... ఈ సారి మార్కెట్‌కు 50 శాతం లోపే పంట సరుకు అమ్మకానికి వస్తుందని... తెలంగాణ ఛాంబర్ ఆఫ్ అగ్రి ట్రేడర్స్ వెల్లడించింది. -రాజేశ్వర్‌, అధ్యక్షుడు, తెలంగాణ ఛాంబర్ ఆఫ్ అగ్రి ట్రేడర్స్
తెలుగు రాష్ట్రాల నుంచి మలక్‌పేట వ్యవసాయ మార్కెట్ యార్డుకు రోజు 5 నుంచి 8 వేల బస్తాలు వస్తోంది. గతేడాది ఇదే సమయంలో 15 నుంచి 18 వేల బస్తాలు వచ్చాయన్న అధికారులు... ఈ ఏడాది దిగుబడి తగ్గిందని పేర్కొన్నారు.
ఇదీ చూడండి : ఆర్డీఎస్‌ కుడికాలువ, తుమ్మిళ్ల ఆపండి.. సూచించిన కృష్ణా బోర్డు
