డీజే సౌండ్ పెంచమంటే... రాళ్లతో కొట్టించాడు

అంగరంగ వైభవంగా పెళ్లి జరిగింది. అనంతరం వివాహ విందుకు అన్ని ఏర్పాట్లు చేశారు. ఎంతో ఖర్చు చేసి డీజే కూడా పెట్టించారు. బాగా చిందులేయొచ్చు అనుకున్న బంధువులంతా... ఒళ్లంతా గాయాలతో ఆస్పత్రి పాలయ్యారు. ఇంతకూ అసలేం జరిగింది? వివాహ విందుకెళ్లిన వారికి దెబ్బలు ఎలా తగిలాయి?

గత నెల 29న నిజామాబాద్ జిల్లా కమ్మర్​పల్లిలో శాంతకుమార్, నందినిల వివాహం కన్నుల పండువగా జరిగింది. 30న వివాహ విందు కోసం వరుడి స్వగృహమైన హైదరాబాద్ దుండిగల్ పీఎస్ పరిధిలోని న్యూ శివాలయం కాలనీకి వచ్చారు. ఈ కార్యక్రమానికి డీజే ఏర్పాటు చేశారు. అందరూ తిని ఇక ఆనందంగా చిందులేస్తూ గడపొచ్చు అనుకున్నారు. డీజే పెట్టి ఒక్కొక్కరుగా డ్యాన్సులు వేస్తున్నారు. రాత్రి 12 గంటలకు డీజే చప్పుడు సరిపోలేదు ఇంకా పెంచాలని అమ్మాయి తరఫు బంధువులు అడిగారు. ససేమిరా పెంచడం కుదరదని నిర్వాహకుడు గట్టిగా చెప్పడంతో వారి మధ్య వాగ్వాదం చెలరేగింది. ఈ గొడవ చిలికి చిలికి గాలివానలా మారింది. బంధువులంతా కలిసి తనని తిడుతున్నారని కోపంతో డీజే నిర్వాహకుడు సూరారం గ్రామానికి చెందిన తన బంధువులు 25 మందిని పిలిపించుకున్నాడు. వారు కట్టెలు, హాకీ స్టిక్స్​, కారం పొడి, రాళ్లతో వచ్చి చుట్టాలందరిపై దాడి చేసి పారిపోయారు.

ఈ దాడిలో పెళ్ళికొడుకు కుటుంబ సభ్యులు నలుగురితోపాటు 17 మంది బంధువులకు గాయాలయ్యాయి. సమాచారం అందుకున్న దుండిగల్ పోలీసులు ఘటనా స్థలానికి చేరుకొని కేసు నమోదు చేసుకున్నారు. ప్రస్తుతం నిందితులు పరారీలో ఉన్నారని త్వరలో వారిని అరెస్టు చేస్తామని పోలీసులు తెలిపారు.

ఇవీ చూడండి: అమ్మో కూర 'గాయం' చేస్తోంది!