'సొంత పొలాల్లోనే కూలీలుగా మారే స్థితికి భాజపా తీసుకొచ్చింది'

కేంద్రం ప్రవేశపెట్టిన వ్యవసాయ బిల్లును హైదరాబాద్​ గాంధీభవన్​లో కాంగ్రెస్​ వర్కింగ్ ప్రెసిడింగ్ పొన్నం ప్రభాకర్​ తీవ్రంగా విమర్శించారు. కేంద్ర ప్రభుత్వం వ్యవసాయాన్ని కార్పొరేట్​ సంస్థలకు ధారాదత్తం చేస్తోందన్నారు. సొంత పొలంలోనే రైతులు కూలీలుగా మారే స్థితి వచ్చిందంటూ ఆవేదన వ్యక్తం చేశారు.

దేశంలోని అన్ని వ్యవస్థలను ఇప్పటికే కార్పొరేట్​ సంస్థలకు కట్టబెడుతున్న భాజపా ప్రభుత్వం ఆఖరికి వ్యవసాయాన్ని ధారాదత్తం చేస్తోందని రాష్ట్ర కాంగ్రెస్​ వర్కింగ్​ ప్రెసిడింట్​ పొన్నం ప్రభాకర్​ రెడ్డి హైదరాబాద్​ గాంధీభవన్​లో ఆరోపించారు. కేంద్రం తీసుకొచ్చిన మూడు చట్టాలతో రైతుకు తీరని అన్యాయం జరుగుతుందని ఆందోళన వ్యక్తం చేశారు. అన్నదాతలు సొంత పొలంలోనే కూలీలుగా మారే పరిస్థితి వస్తుందన్నారు. పార్లమెంట్​లో బిల్లులు ప్రవేశపెట్టిన దగ్గర నుంచి కాంగ్రెస్​ తీవ్రంగా వ్యతిరేకిస్తోందన్నారు.

శుక్రవారం గాంధీ, లాల్​బహదూర్​ శాస్త్రి జన్మదినాలను పురస్కరించుకుని కాంగ్రెస్​ సంతకాల సేకరణ చేస్తుందని పొన్నం తెలిపారు. నవంబర్​ 14న రైతుల సంతకాలను రాష్ట్రపతికి అందజేయనున్నట్లు పేర్కొన్నారు. కేసీఆర్​ పార్లమెంట్​లో మొసలి కన్నీరు కారుస్తున్నారని దుయ్యబట్టారు. సున్నా వడ్డీని తుంగలో తొక్కి.. ముఖ్యమంత్రి కేసీఆర్​ రైతుల నడ్డీ విరగొట్టారని పొన్నం విమర్శించారు.

ఇదీ చదవండిః వ్యవసాయ చట్టానికి వ్యతిరేకంగా రైతుల సంతకాల సేకరణ