హైదరాబాద్కు చెందిన విజయ్ కుమార్ బెంగళూరులోని గోల్డ్ ఏజ్ హోమ్లో ఉద్యోగం చేస్తున్నాడు. అతడి భార్య, ఇద్దరు కూతుళ్లు హైదరాబాద్లోని కొత్తపేట గ్రీన్పార్క్ కాలనీలో ఉంటున్నారు. లాక్డౌన్ వల్ల విజయ్ హైదరాబాద్ రాలేక.. బెంగళూరులో ఉండలేక ఇబ్బంది పడుతున్నాడు. అయినా.. పరిస్థితుల ప్రభావం వల్ల భార్యకు, పిల్లలకు నచ్చజెప్పి అక్కడే ఉంటున్నాడు. ఇదే సమయంలో విజయ్ కూతురు రుచిత పుట్టినరోజు వచ్చింది. ప్రతీ సంవత్సరం రుచిత పుట్టినరోజు నాడు.. కుటుంబ సభ్యులందరూ కలిసి కేక్ కట్ చేస్తారు. కానీ.. ఈసారి అలా చేయడం కుదరలేదు. కారణం… కరోనా.. లాక్డౌన్.
పిల్లలు ఫోన్ చేస్తుంటే.. విజయ్కి ఏం చేయాలో తోచలేదు. ఎలాగైనా తన తరపున రుచితకు కేక్ కట్ చేయించాలనుకున్నాడు. పోలీసులకు ఫోన్ చేశాడు. సరూర్ నగర్ ఎస్సై సంజీవరెడ్డి స్పందించి.. కేక్ తీసుకొని విజయ్ ఇంటికెళ్లాడు. రుచితతో కేక్ కట్ చేయించాడు. రుచిత సంతోషంగా కేక్ కట్ చేసింది. ఇదంతా వీడియో కాల్లో చూసి విజయ్ సంతోషం వ్యక్తం చేశాడు. తన కూతురు పుట్టిన రోజు నాడు సంతోషంగా ఉండేందుకు సహకరించిన పోలీసులకు ధన్యవాదాలు తెలియజేశాడు. మానవతా దృక్పథంతో స్పందించిన పోలీసులు, ఒక కుటుంబం మధ్య ఉండే ప్రేమ, ఆప్యాయతలకు ఈ ఘటన అద్దం పట్టింది.
ఇదీ చూడండి: ఈ బాధ ఏ తల్లికి రావొద్దు.. రిక్షాపై తీసుకెళ్లి అంత్యక్రియలు
