Police Jobs in telangana : పోలీస్‌ కొలువు ఎందరికో స్వప్నం.. ఎస్సై పోస్టు కోసం డిగ్రీ, కానిస్టేబుల్‌ కొలువుకు ఇంటర్‌ విద్యార్హత అయినా బీటెక్‌, ఎంటెక్‌, పీజీ చదివిన ఉన్నత విద్యావంతులూ దరఖాస్తు చేస్తుంటారు. క్రితంసారి 16,925 పోస్టులకు దాదాపు ఆరు లక్షల మంది పోటీ పడ్డారు. ప్రస్తుతం 17,003 కొలువులున్నాయి. మిగిలిన ఉద్యోగాలతో పోల్చితే పోలీస్‌ కొలువు దక్కించుకోవడంలో దేహదారుఢ్య పరీక్ష కీలకం. గతంలో అయిదు కి.మీ.ల పరుగును సకాలంలో పూర్తి చేస్తేనే ఉద్యోగానికి మార్గం సుగమమయ్యేది. కఠినమైన ఈ నిబంధన వల్ల ఇబ్బందులు తలెత్తడంతో క్రితంసారి నుంచే ఈ ఈవెంట్‌ను తొలగించారు. అయినాసరే మిగిలిన దేహదారుఢ్య పరీక్షల్లో అర్హత సాధించేందుకు నిరంతరం చెమటోడ్చటం తప్పనిసరి.
పీఎంటీ.. పీఈటీలే కీలకం: దరఖాస్తుదారులందరికీ తొలుత ప్రాథమిక రాతపరీక్ష నిర్వహిస్తారు. సామాజిక వర్గాల వారీగా నిర్ణీత మార్కుల్ని సాధించిన వారిని అర్హులుగా పరిగణిస్తారు. ఆ తర్వాత ఫిజికల్‌ మెజర్‌మెంట్స్‌ టెస్ట్‌(పీఎంటీ)నిర్వహిస్తారు. ఈ పరీక్షలో అభ్యర్థుల ఎత్తు, బరువు వంటి కొలతల్ని పరిగణనలోకి తీసుకుంటారు. ఇవి నిర్ణీత ప్రమాణంలో ఉంటే ఫిజికల్‌ ఎఫిషియెన్సీ టెస్ట్‌(పీఈటీ)కు అర్హత సాధించినట్లు ప్రకటిస్తారు. ఈ దశలో పరుగు పందెం, లాంగ్‌జంప్‌, హైజంప్‌, షాట్‌పుట్‌ వంటి దేహదారుఢ్య పరీక్షలు నిర్వహిస్తారు. ఇక్కడా అర్హత సాధించగలిగితే తుది రాత పరీక్షకు ఎంపిక చేస్తారు. ఈ పరీక్ష ఫలితాల ఆధారంగానే విజేతలను ఎంపిక చేస్తారు.
శారీరక కొలతలు ఇలా..(సెంటీమీటర్లలో...)
800 మీటర్ల పరుగుపై పట్టు సాధించాలి : "పోలీస్‌ కొలువు సాధించడంలో దేహదారుఢ్య సామర్థ్యం మెరుగుపరుచుకోవడం కీలకం. పురుష అభ్యర్థులు ముఖ్యంగా 800 మీటర్ల పరుగుపై పట్టు సాధించాలి. ఎక్కువ మంది ఈ అంశంలోనే విఫలమవుతుంటారు. అందుకే సన్నద్ధతలో భాగంగా సకాలంలో ఈ పరుగును పూర్తి చేసేందుకు సమయం కేటాయించాలి. మిగిలిన అంశాల్లో శిక్షకుల సూచనలకు అనుగుణంగా నైపుణ్యం సాధించాలి."
- స్టీఫెన్ రవీంద్ర, సైబరాబాద్ కమిషనర్‌
సమతుల ఆహారం.. కసరత్తుకు సహకారం : ప్రస్తుతం వేసవి దృష్ట్యా అప్రమత్తంగా ఉంటూ వ్యాయామానికి తగ్గట్టుగా ఆహారం తీసుకుంటూ దేహదారుఢ్య పరీక్షల కోసం అభ్యర్థులు కసరత్తులు కొనసాగించాలని నిపుణులు సూచిస్తున్నారు. ఉదయాన్నే 7 గంటలలోపు కసరత్తు ముగించుకునేలా చూసుకోవాలంటున్నారు. సాయంత్రం 5 గంటల తర్వాత మైదానంలో ప్రాక్టీసు చేయాలని, లేదంటే డీహైడ్రేషన్‌కు గురయ్యే అవకాశం ఉందని నిపుణులు చెబుతున్నారు. వేసవి కాబట్టి రోజూ 3-4 లీటర్లకు తగ్గకుండా నీరు తాగాలని.. నిమ్మరసం, చిటికెడు ఉప్పు కలిపిన నీరు, మజ్జిగ వంటివి ఎక్కువ తీసుకోవాలని చెబుతున్నారు. మధుమేహం లేని వ్యక్తులు పుచ్చకాయ, కర్బూజ తీసుకుంటే మేలని చెబుతున్నారు.
దేహదారుఢ్య సామర్థ్యం ఇలా..
వంట నూనెలు మార్చుతుండాలి : "అభ్యర్థులు తప్పనిసరిగా సమతుల ఆహారానికి ప్రాధాన్యం ఇవ్వాలి. వంట నూనెలు ఎప్పటికప్పుడు మార్చాలి. దీనివల్ల ఫ్యాటీ ఆమ్లాలు లభించడంతో రక్త ప్రసరణ ఎక్కువగా జరుగుతుంది. మాంసకృతుల కోసం కందిపప్పు, పెసరపప్పు, చిక్కుడు, బీన్స్‌ వంటివి తీసుకోవాలి. నాన్‌వెజ్‌ తినేవారు చేపలు, మాంసం తినవచ్చు. డ్రైఫ్రూట్స్‌, ఆక్రూట్‌, బాదం, పిస్తా వంటివి రోజుకు 30 గ్రాములు తింటే మంచిది. కాయగూరలు ఎక్కువగా తీసుకోవడం వల్ల శరీరానికి పీచుపదార్థాలు లభిస్తాయి. మలబద్దకం వంటి సమస్యలు అధిగమించే వీలుంది. ప్రస్తుతం అందుబాటులో ఉన్న ఏవైనా పండ్లు 300 గ్రాములు తీసుకుంటే మేలు. వీటి వల్ల శక్తి లభిస్తుంది. మనం తీసుకునే ఆహారానికి తగ్గట్టుగా వ్యాయామం చేయడం ఎంతో ముఖ్యం. అప్పుడే అనవసరమైన కొవ్వు శరీరంలో పేరుకుపోకుండా ఉంటుంది."
- డా.డి.రఘునాథరావు, పోషకాహార నిపుణులు
ప్రణాళిక ఎంతో ముఖ్యం : "వ్యాయామం చేసే అభ్యర్థులు నిత్యం ఆహార ప్రణాళిక వేసుకుని..ఆ ప్రకారం తింటే మేలు. ఉదయం లేచాక గ్లాసు పాలు, గుడ్డు, అరచేతికి సరిపడా డ్రైఫ్రూట్స్‌ తీసుకోవాలి. కసరత్తుల తర్వాత అల్పాహారం తీసుకోవాలి. ఇందులో నూనెతో చేసిన బొండా, వడ వంటివి లేకుండా ఉంటే మేలు. ఇడ్లీ, పోహా, తక్కువ నూనెతో చేసిన దోశ, పన్నీర్‌ శాండ్‌విచ్‌ తీసుకోవాలి లేదా పండ్లు తినొచ్చు. మధ్యాహ్నం అన్నం లేకుండా రొట్టెలు లేదా చిరుధాన్యాలతో భోజనం చేస్తే మంచిది. రాత్రి 7-8 మధ్య గంటలకు నూనెతో చేసిన వంటకాలు తక్కువగా ఉండేలా భోజనం చేయాలి. పడుకునేముందు రాగిజావ లేదా పాలు, పండ్లు తీసుకుంటే మేలు. మాంసకృత్తుల కోసం నాటుకోడి తినాలి. ఉప్పు, చక్కెర ఎక్కువగా ఉన్న పదార్థాలు తక్కువగా తీసుకోవాలి."
- సయ్యదా సనా, పోషకాహార నిపుణురాలు
నోట్‌ : పురుషులు 800 మీటర్ల పరుగు సహా మరో 2 అంశాల్లో మహిళలు 100 మీటర్ల పరుగు.. మరో అంశంలో అర్హత సాధించాలి
ఇవీ చూడండి : Study Circles: స్టడీ సర్కిళ్లు లేవు.. సరైన సదుపాయాల్లేవ్..
KTR Comments: 'రాబోయే 6 నుంచి 9 నెలల్లో ఉద్యోగాలను భర్తీ చేయబోతున్నాం'
