ఆంధ్రప్రదేశ్ కృష్ణా జిల్లా నూజివీడు పట్టణం ఎండీవో కార్యాలయం సమీపంలోని యానాదుల కాలనీలో నరసింహారావు అనే గిరి పుత్రుడు ఉంటున్నాడు. అతను చేసిన వినూత్న ప్రయోగం.. నేడు రైతులకు ఎంతో ప్రయోజనకరంగా మారింది. రెండు పైపులు, ఒక గ్యాస్ లైటర్, ఒక క్యారీబ్యాగ్, కొద్దిగా సెంటు వినియోగిస్తే బాంబు పేల్చిన శబ్దం సృష్టించవచ్చని ఆలోచించాడు. ఈ ఆలోచన నుంచి కోతుల గుంపు తరిమేందుకు కొత్త పరికరం తయారు చేశాడు. ఇప్పుడు కోతులను తరిమికొట్టడం సులువైంది.
'కోతుల గుంపు తరిమేందుకు నేను ఎన్నో ప్రయత్నాలు చేసే వాడిని. చిన్నతనంలో టపాకాయలు తయారు చేయడం, ఉండేలుతో కోతులను తరమడం వంటివి చేసేవాడిని. వాటి నుంచి వచ్చిన ఆలోచనతోనే పైపులతో కొత్తగా తయారు చేసిన ఈ పరికరం రూపుదిద్దుకుంది. 3 అంగుళాల పైపు మూడడుగులు, రెండంగుళాల పైప్ మూడడుగులు తీసుకొని రెండింటినీ కలపాలి. వెనక వైపు మూత బిగించి, పైన గ్యాస్ లైటర్ ఏర్పాటు చేయాలి. ముందు నుంచి సెంటులో కొద్దిగా నీళ్లు కలిపి పైపులో పోసి, మూతి వద్ద క్యారీబ్యాగ్ బిగించాలి. గ్యాస్ లైటర్తో ఒత్తిడి పెంచితే ద్రావణం వేగంగా వచ్చి క్యారీ బ్యాగ్కు తగలి బాంబు వలే పెద్ద శబ్దం వస్తుంది'. అని నరసింహారావు వివరించాడు.
ఈ పరికరం వినియోగించడం ద్వారా కోతుల మూక వేగంగా పరుగులు తీస్తున్నాయి. ఇది చూసిన రైతులందరూ హ్యాట్సాఫ్ నరసింహారావు అంటూ ప్రశంసిస్తున్నారు.
ఇదీ చదవండి: సుప్రీంకోర్టులో రేవంత్‌రెడ్డి పిటిషన్‌ కొట్టివేత
