వడ్డీ లేకుండా రుణాలు ఇప్పిస్తామని ఆన్లైన్లో మోసాలకు పాల్పడుతున్న ముగ్గురు వ్యక్తులను సీసీఎస్ సైబర్ క్రైమ్ పోలీసులు అరెస్ట్ చేశారు. దిల్లీకి చెందిన సూరజ్ వర్మ, సోనూ శర్మ, జితేందర్ సింగ్లు నోయిడా కేంద్రంగా ఆన్లైన్లో రుణాల పేరుతో మోసాలకు పాల్పడుతున్నారు. హైదరాబాద్ ఖైరతాబాద్కి చెందిన సాయినాథ్ లోన్ కోసం ప్రయత్నిస్తున్నట్లు డేటా సేకరించిన ఈ ముఠా.. వడ్డీ లేకుండా 10 లక్షల వరకు రుణం ఇప్పిస్తామని నమ్మించారు. ముందుగా రిజిస్ట్రేషన్, జీఎస్టీ ఛార్జీలు, 3నెలల అడ్వాన్స్, ఈఎమ్ఐల పేరుతో 78 వేల రూపాయలు అకౌంట్కి ట్రాన్స్ఫర్ చేయించుకున్నారు. త్వరలో లోన్ డబ్బులు తన అకౌంట్లో జమ అవుతాయని నమ్మించారు. కొద్దిరోజుల తర్వాత లోన్ రాకపోగా.. వారికి కాల్ చేస్తే స్విచ్ ఆఫ్ వచ్చింది. మోసపోయానని గ్రహించిన.. సాయినాథ్ హైదరాబాద్ సీసీఎస్ సైబర్ క్రైమ్ పోలీసులకు ఫిర్యాదు చేశాడు. కేసు నమోదు చేసుకున్న పోలీసులు .. ఢిల్లీ కేంద్రంగా సాగుతున్న ముఠాను అరెస్ట్ చేసి రిమాండ్కు తరలించారు. వారి నుండి ల్యాప్ టాప్, చెక్కులు,చరవాణీలను స్వాధీనం చేసుకుని సీజ్ చేశారు. వీరు దేశవ్యాప్తంగా మోసాలకు పాల్పడుతున్నట్లు పోలీసులు గుర్తించారు.
ఇవీ చూడండి:లైక్లు దాయనున్న ఫేస్బుక్.. ఎందుకో తెలుసా?
