Rescheduling TSPSC exams: గ్రూప్-1 ప్రిలిమినరీతో పాటు అసిస్టెంట్‌ ఎగ్జిక్యూటివ్‌ ఇంజినీర్‌, డివిజనల్‌ అకౌంట్స్‌ అధికారి గ్రేడ్‌-2 పోస్టుల పరీక్షలను టీఎస్పీఎస్సీ రద్దు చేసింది. ఆయా పరీక్షల ప్రశ్నపత్రాలు ముందుగానే బయటకు వచ్చినట్లు తెలియడంతో కమిషన్‌ ఈ మేరకు నిర్ణయం తీసుకుంది. ఇప్పటికే అసిస్టెంట్‌ ఇంజినీరు పరీక్షను రద్దు చేసినందున ఈ జాబితాలో నాలుగు నోటిఫికేషన్ల పరీక్షలు చేరాయి. ప్రశ్నపత్రాల లీకేజీ నేపథ్యంలో ఏర్పాటైన ప్రత్యేక దర్యాప్తు బృందం నివేదిక, టీఎస్పీఎస్సీ అంతర్గత విచారణ నివేదికపై ఛైర్మన్‌ జనార్దన్‌రెడ్డి ఆధ్వర్యంలో కమిషన్‌ అత్యవసరంగా సమావేశమైంది. ఆయా నివేదికలపై చర్చించి.. ఈ మూడు పరీక్షలకు సంబంధించిన ప్రశ్నాపత్రాలు ముందుగానే బయటకు వచ్చినట్లు నిర్ధారణకు వచ్చింది. దీంతో పరీక్షలు రద్దు చేస్తున్నట్లు ప్రకటించింది.
గ్రూప్-1 ప్రిలిమనరీ జూన్ 11న: ప్రశ్నపత్రాల లీకేజ్ అయినందున పరీక్షల షెడ్యూలును రీ షెడ్యూలు చేయాల్సిన పరిస్థితి ఏర్పడింది. ప్రశ్నాపత్రాలన్నీ కొత్తగా రూపొందించాల్సి ఉండటంతో.. ఇక నుంచి జరిగే పరీక్షలు దాదాపు రీ షెడ్యూలు అయ్యే అవకాశముంది. ఏప్రిల్, మే నెలలో ఎగ్జామ్స్ ఎప్పుడు నిర్వహించాలన్న అంశంపై కమిషన్‌ ఆలోచిస్తోంది. అక్టోబరు నుంచి ఇప్పటి వరకు టీఎస్పీఎస్సీ నిర్వహించిన ఏడు పరీక్షల్లో ఇప్పటికే నాలుగు రద్దయ్యాయి. తొలుత ఏఈ పరీక్ష రద్దుకాగా తాజాగా గ్రూప్-1, డీఏఓ, ఏఈఈ పరీక్షలు ఆ జాబితాలో చేరాయి. గ్రూప్-1 ప్రిలిమినరీని జూన్ 11న తిరిగి నిర్వహించనున్నట్లు కమిషన్‌ వెల్లడించింది. రద్దయిన మిగతా పరీక్షల షెడ్యూలు త్వరలో వెల్లడిస్తామని తెలిపింది. పరీక్షల రీ షెడ్యూలుతో ఉద్యోగాల భర్తీ ప్రక్రియ ఇంకాస్త ఆలస్యం అవ్వనుంది. ప్రస్తుతం కేంద్ర ప్రభుత్వ, ఇతర బోర్డులు, కమిషన్ల ద్వారా భర్తీ చేసే ఉద్యోగాలకు షెడ్యూలు వచ్చింది. అభ్యర్థులు మిగతా పోటీపరీక్షలూ రాసేలా పరీక్షల తేదీలు నిర్ణయించాల్సిన అవసరం ఉంది.
గ్రూప్-1 రద్దు అవ్వడం జీర్ణించుకోలేకపోతున్నాం: ఉమ్మడి రాష్ట్రంలో చివరిసారి 2011లో గ్రూప్-1 ప్రకటన వెలువడింది. రాష్ట్ర ఏర్పాటు నుంచి 2022 వరకు మళ్లీ నోటిఫికేషన్‌ రాలేదు. దాదాపు 11 ఏళ్ల తరువాత 2022 ఏప్రిల్ 26న రికార్డు స్థాయిలో 503 పోస్టులతో తెలంగాణలో తొలి గ్రూప్-1 ప్రకటనను వెలువరించింది. రాష్ట్రవ్యాప్తంగా 3,80,202 మంది దరఖాస్తు చేశారు. అక్టోబరు 16న ప్రిలిమినరీ నిర్వహించగా 2,85,916 మంది రాశారు. మెయిన్స్‌కు ప్రిలిమ్స్ క్వాలిఫై అయిన వారికి షెడ్యూలు ప్రకారం జూన్‌లో ప్రధాన పరీక్షలు జరగాల్సి ఉంది. ఇంతలోనే లీకేజీ నేపథ్యంలో ప్రాథమిక పరీక్ష రద్దయింది. గ్రూప్-1 కోసం కొన్ని సంవత్సరాలుగా చదివామని.. రద్దు అవ్వడం జీర్ణించుకోలేకపోతున్నామని.. ప్రిలిమినరీ పరీక్ష క్యాలిఫై అయి ప్రధాన పరీక్షకు సన్నద్ధమవుతున్న అభ్యర్థులు ఆవేదన వ్యక్తం చేస్తున్నారు.
ఇవీ చదవండి:
