రాష్ట్ర ప్రభుత్వం బతుకమ్మ చీరల తయారీకి శ్రీకారం చుట్టింది. బంగారు, వెండి రంగు అంచులతో మరింత నాణ్యత, నవ్యతతో సిద్ధంచేసేందుకు ప్రణాళిక రూపొందించారు. మొత్తం 225 డిజైన్లతో సెప్టెంబరు ఆఖరుకల్లా కోటి చీరలు తయారు చేయనున్నారు. రాష్ట్ర చేనేత, జౌళి శాఖ ఈ ప్రక్రియను ఆద్యంతం పర్యవేక్షించనుంది.
ఏటా దాదాపు కోటి మందికి అందజేత
తెలంగాణ సంస్కృతి, సంప్రదాయాలను చాటే బతుకమ్మ పండగ సందర్భంగా.. 18 ఏళ్లు దాటిన పేద మహిళలకు ప్రభుత్వం గత నాలుగేళ్లుగా చీరలను కానుకగా అందజేస్తోంది. ఏటా దాదాపు కోటి మందికి ఇవి చేరుతున్నాయి. 2020 బతుకమ్మ పండగ చీరల తయారీపై ఇటీవల చేనేత, జౌళి శాఖ మంత్రి కేటీఆర్‌ సమీక్ష నిర్వహించారు. మరింత నాణ్యత, నవ్యతతో చీరలను రూపొందించాలని నిర్ణయించారు. మంత్రి ఆదేశాల మేరకు చేనేత శాఖ సర్వే నిర్వహించింది.
మేడారం జాతరలో చీరలపై సర్వే
ఇప్పటి వరకు పంపిణీ చేసిన చీరల వినియోగం, కొత్తవి ఎలా ఉండాలనే అనే అంశంపై మహిళల అభిప్రాయాలను సేకరించారు. నిఫ్ట్‌ నిపుణులు, మహిళా సంఘాలతో మాట్లాడారు. జరి అంచులు ఆకట్టుకుంటున్నాయని.. బంగారు, వెండి రంగు అంచులు కావాలని ఇటీవల మేడారం జాతరలో నిర్వహించిన సర్వేలో మహిళలు కోరారు. వీటన్నింటిపైనా చేనేత, జౌళి శాఖ కమిషనర్‌ శైలజారామయ్యర్‌ మంత్రి కేటీఆర్‌కు నివేదిక సమర్పించారు.
బతుకమ్మ చీరలకు విశేష ఆదరణ ఉందని సర్వేలో తేలిన నేపథ్యంలో మహిళలు ఆశిస్తున్న మరిన్ని డిజైన్లతో వీటిని రూపొందించాలని మంత్రి ఆదేశించారు. దీనికి అనుగుణంగా చేనేత శాఖ.. ఉత్పత్తి ప్రణాళికను సిద్ధం చేసింది.
సిరిసిల్లలో చీరల ఉత్పత్తి ప్రారంభం
సిరిసిల్లలోని నేతన్నలకు నూలు పంపిణీ చేయగా.. వారు చీరల ఉత్పత్తిని ప్రారంభించారు. 16 వేల మంది కార్మికులు 26 వేల మరమగ్గాలపై పనులు మొదలుపెట్టారు. మొదట్లో 30 డిజైన్లతో చీరలు ఉండేవి. గత ఏడాది వాటిని వందకు పెంచారు. ఈ సారి ఏకంగా 225 డిజైన్లు అందుబాటులోకి తీసుకొస్తున్నారు. గత సంవత్సరం ఆరు నెలల లక్ష్యాన్ని నిర్దేశించగా... పండగ వచ్చేసరికి ఉత్కంఠ నెలకొంది. ఈ సారి ఏడు నెలల లక్ష్యంతో చీరలను తయారు చేయించి.. సెప్టెంబరు మాసాంతం వరకు జిల్లాలకు చేర్చనున్నారు.
బతుకమ్మ చీరలు - ప్రభుత్వ ప్రణాళిక
- ప్రాజెక్టు వ్యయం : రూ. 317 కోట్లు
- ఒక్కో చీరకు ఖర్చు : రూ. 287
- ఒక్కో నేత కార్మికుడికి సగటున రాబడి : రూ. 20 వేలు
- 6.30 మీటర్ల పొడవైన చీరలు : దాదాపు 90 లక్షలు
- 9 మీటర్ల పొడవైన చీరలు : 10 లక్షలు
ఇవీ చూడండి: రైతు భరోసా కోసం "అగ్రిటెక్ సౌత్ - 2020"
