రాష్ట్రంలో బాలికల హక్కులకు భంగం కలిగితే సహించేది లేదని, అత్యాచారాలకు పాల్పడ్డ వారిని వదిలిపెట్టేది లేదని స్త్రీ, శిశు సంక్షేమ శాఖ మంత్రి సత్యవతి రాఠోడ్ పేర్కొన్నారు. నాగర్ కర్నూల్ జిల్లా లింగాల మండలంలో జరిగిన అత్యాచార ఘటనపై తీవ్రంగా స్పందించిన మంత్రి.. విచారణ చేసి తగిన చర్యలు తీసుకోవాలని అధికారులను ఆదేశించారు. మంత్రి ఆదేశాల మేరకు జిల్లా మహిళా, శిశు సంక్షేమ శాఖ అధికారులు ఆ ప్రాంతానికి వెళ్లి విచారణ చేపట్టారు.
ఓ బాలికపై ఇద్దరు మైనర్ బాలురు అత్యాచారయత్నం చేసి, ఆ ఘటనను సెల్ఫోన్లో చిత్రీకరించినట్లు అధికారులు నిర్ధారించారు. ఆ ఇద్దరిలో ఒకరికి నేర ప్రవృత్తి ఉన్నట్లు పోలీసులు తేల్చారు. ఇద్దరు బాలురపై ఫోక్సో చట్టం కింద కేసు నమోదైందని, జువైనైల్ జస్టిస్ బోర్డు ముందు హాజరుపరుస్తామని తెలిపారు. బాధిత బాలికను వైద్య పరీక్షల నిమిత్తం నాగర్కర్నూల్ ప్రభుత్వ ఆసుపత్రికి తరలించామని, నివేదిక రాగానే తగిన చర్యలు తీసుకుంటామని అధికారులు చెప్పారు.
ఈ సందర్భంగా బాధిత కుటుంబానికి ప్రభుత్వం తరఫున అండగా నిలుస్తామని, ఫోక్సో చట్టం కింద పరిహారం అందిస్తామని మంత్రి సత్యవతి రాఠోడ్ తెలిపారు. కేసు త్వరగా తేలేలా ఎప్పటికప్పుడు పర్యవేక్షించాలని.. బాధిత కుటుంబానికి తగిన రక్షణ కల్పించాలని అధికారులను ఆదేశించారు.
ఇదీ చూడండి: 'కల్యాణలక్ష్మి, షాదీ ముబారక్ పథకాలు పేదలకు వరాలు'
