Minister Roja meets CM KCR: ఆంధ్రప్రదేశ్ గురించి మంత్రి కేటీఆర్ ఎక్కడా మాట్లాడలేదని ఆ రాష్ట్ర మంత్రి ఆర్కే రోజా అన్నారు. పొరుగు రాష్ట్రాలు అని ప్రస్తావించారే కానీ.. ఏపీ ప్రస్తావన ఎక్కడే తీసుకురాలేదని చెప్పారు. ఒకవేళ ఏపీ గురించే కేటీఆర్ మాట్లాడి ఉంటే ఆయన వ్యాఖ్యలను ఖండిస్తున్నట్లు స్పష్టం చేశారు. ఆంధ్రప్రదేశ్ మంత్రిగా పదవీబాధ్యతలు స్వీకరించాక మొదటిసారిగా ఆర్కే రోజా.. కుటుంబసమేతంగా ప్రగతిభవన్కు వచ్చారు. మంత్రి పదవిలో కేసీఆర్ను మర్యాదపూర్వకంగా కలిసిన రోజా.. సీఎంతో పలు అంశాలపై చర్చించారు. ఏపీ నూతన మంత్రిగా బాధ్యతలు స్వీకరించిన రోజాను.. కేసీఆర్ శాలువాతో సత్కరించి అభినందనలు తెలిపారు. ఈ సందర్భంగా కేసీఆర్ చిత్రపటాన్ని సీఎంకు రోజా బహుకరించారు.
దేశంలోనే లేదు: కేసీఆర్తో సమావేశం అనంతరం బయటకు వచ్చిన రోజా.. మీడియాతో మాట్లాడారు. ఏపీ గురించి కేటీఆర్ వ్యాఖ్యలపై ఆమె స్పందించారు. క్రెడాయ్ ప్రాపర్టీ షోలో ఏపీ గురించి కేటీఆర్ గురించి మాట్లాడి ఉంటే ఆ వ్యాఖ్యలను ఖండిస్తున్నట్లు చెప్పారు. ఏపీలో అమలవుతున్న అభివృద్ధి దేశంలోనే ఎక్కడైనా ఉందా అని రోజా ప్రశ్నించారు. ఏపీ పథకాలు, విప్లవాత్మక మార్పులను పక్క రాష్ట్రాల్లోనూ అమలు చేస్తున్నారని మంత్రి అన్నారు.
"యంగ్ అండ్ డైనమిక్ లీడర్ కేటీఆర్ను సాదరంగా ఆంధ్రప్రదేశ్కు ఆహ్వానిస్తున్నాను. ఏపీలో నాడు- నేడు కింద పాఠశాలలు, ఆస్పత్రులు ఎలా చేశామో చూపిస్తాను. గ్రామ సచివాలయాలను కేటీఆర్కు చూపిస్తాను. ఏపీని చూసి తమిళనాడులో గ్రామ సచివాలయాలు ఏర్పాటు చేశారు. కేటీఆర్ తేదీ, సమయం ఇస్తే పర్యాటకశాఖ మంత్రిగా ఏపీ మొత్తం తిప్పి చూపిస్తాను. కేటీఆర్ను తప్పుదోవ పట్టించారని అర్థమవుతుంది. జగన్ దేశానికే ఆదర్శంగా ఎలా పనిచేస్తున్నారో, అవినీతికి తావులేకుండా ఎలా లబ్ధిదారులకు అందిస్తున్నారో తెలియజేస్తాను." -ఆర్కే రోజా, ఏపీ పర్యాటక, క్రీడలు, యువజన శాఖల మంత్రి
మనోభావాలు దెబ్బతింటాయి: ఇక విద్యుత్ కోతల విషయానికొస్తే.. తెలంగాణ సహా 16 రాష్ట్రాల్లో కోతలున్నాయని మంత్రి రోజా అన్నారు. వరదల్లో రోడ్లు దెబ్బతిన్నాయని.. ఇప్పుడు వేస్తూనే ఉన్నారని పేర్కొన్నారు. ఎవరో చెప్పిన వాళ్ల మాటలు విని మాట్లాడితే ఆంధ్రా వాళ్ల మనోభావాలు దెబ్బతింటాయని వెల్లడించారు. సీఎం కేసీఆర్ను మర్యాదపూర్వకంగా కలిసినట్లు పేర్కొన్న రోజా.. మంత్రి అయ్యాక కుటుంబసభ్యులతో కలిసి ప్రగతిభవన్కు రావాలని కేసీఆర్ ఆహ్వానించినట్లు తెలిపారు.
మంత్రిగా రోజా బాధ్యతలు చేపట్టకముందు.. ఈ నెల 1 న యాదాద్రిని సందర్శించారు. శ్రీ లక్ష్మీ నరసింహస్వామిని దర్శించుకుని ముడుపు కట్టారు. పునర్నిర్మాణం తర్వాత యాదాద్రి వైభవాన్ని చూసి ఆమె తన్మయత్వం పొందారు. ఆలయ ప్రాభవాన్ని చూసేందుకు రెండు కళ్లు సరిపోవని.. యాదాద్రి పునర్నిర్మాణానికి కృషి చేసిన సీఎం కేసీఆర్పై ప్రశంసల జల్లు కురిపించారు. తిరుమలతో సమానంగా యాదగిరిగుట్టను పునర్నిర్మించడం పట్ల ఆమె హర్షం వ్యక్తం చేశారు. ఈ నెల 13న రోజా.. ఆంధ్రప్రదేశ్ పర్యాటక, క్రీడలు, యువజన శాఖల మంత్రిగా పదవీబాధ్యతలు స్వీకరించారు.
ఇవీ చదవండి: 'భాజపా కార్యకర్తలు చిల్లరగా వ్యవహరించారు... నితిన్ గడ్కరీ సారీ చెప్పారు'
