రాష్ట్రాల వైద్య ఆరోగ్య శాఖ మంత్రులతో ఈరోజు కేంద్ర మంత్రి హర్షవర్ధన్ నిర్వహించిన వీడియో కాన్ఫరెన్స్లో మంత్రి ఈటల రాజేందర్ పాల్గొన్నారు. రాష్ట్రంలో వైద్య పరికరాలు, కరోనా వైరస్ నివారణ కోసం వినియోగిస్తున్న మందులను బ్లాక్ మార్కెట్ జరగకుండా చూడాలని కోరారు. బీఆర్కే భవన్ నుంచి వీడియో కాన్ఫరెన్స్లో పాల్గొన్న ఈటల... రాష్ట్రంలో, దేశంలో తయారవుతున్న మందులు, వైద్య పరికరాలపై టాక్స్లు ఎత్తివేయాలని విజ్ఞప్తి చేశారు. విదేశాల నుంచి దిగుమతి చేసుకునే వైద్య పరికరాలను కస్టమ్స్, ట్యాక్స్ రద్దు చేయాలని కోరారు.
వెంటిలేటర్లు, ఇతర వైద్య పరికరాలను ఈసీఐఎల్, డీఆర్డీ లాంటి సంస్థల్లో తయారు చేసి రాష్ట్ర ప్రభుత్వాలకు అందించాలని కేంద్రానికి విన్నవించారు. వీలైనంత త్వరగా ఎన్- 95మాస్కులు, పీపీఈ కిట్, కరోనా టెస్టింగ్ కిట్లను అందించాలని కోరారు. ఇప్పటివరకు తెలంగాణలో కమ్యునిటీ ట్రాన్స్మిషన్ జరగలేదని.. 8,500 మందికి కరోనా పరీక్షలు చేస్తే 471 మందికి పాజిటివ్ వచ్చినట్టు కేంద్రానికి వివరించారు.
ఇవీ చూడండి: తప్పని పరిస్థితుల్లో ఇలా చేయాల్సి వస్తోంది: దానం
