ఆశ తీరింది..

భాషా పండితులు, వ్యాయామ ఉపాధ్యాయుల కల సాకారం అయింది. వారికి స్కూల్ అసిస్టెంట్ హోదా ఇస్తూ ప్రభుత్వం జీఓ జారీ చేసింది.

భాషాపండితులు, వ్యాయామోపాధ్యాయులు దశాబ్దాలుగా ఎదురుచూస్తున్న శుభతరుణం ఆసన్నమయింది. ఇతర సబ్జెక్టుల ఉపాధ్యాయులతో సమాన హోదా కావాలనే ఆశ తీరింది. ఇప్పటివరకు గ్రేడ్‌-2 హోదాతో ఉన్న మొత్తం 10,479 మందికి ఇక స్కూల్‌ అసిస్టెంట్‌ హోదా దక్కనుంది. ఈ మేరకు ఆర్థికశాఖ ముఖ్య కార్యదర్శి రామకృష్ణారావు జీఓ జారీ చేశారు. రాష్ట్రవ్యాప్తంగా ప్రాథమికోన్నత, ఉన్నత పాఠశాలల్లో పనిచేసే ఉపాధ్యాయులు స్కూల్‌ అసిస్టెంట్‌ హోదాలో ఉన్నారు. అందులోనే పనిచేసే భాషా పండితులతో పాటు వ్యాయామ ఉపాధ్యాయులకు మాత్రం గ్రేడ్‌-2 హోదానే ఉంది. తమను చిన్నచూపు చూస్తున్నారని, తమకూ ఎస్‌ఏ హోదా ఇవ్వాలని డిమాండ్ చేస్తూ వచ్చారు.