ప్రస్తుతం నెలకొన్న కరోనా సంక్షోభ పరిస్థితుల నేపథ్యంలో హైదరాబాద్ ఫార్మాసిటీ ప్రాధాన్యం, అవసరం మరింతగా పెరిగిందని పరిశ్రమల శాఖ మంత్రి తారక రామారావు అన్నారు. ఇప్పటికే హైదరాబాద్ నగరం లైఫ్ సైన్సెస్, ఫార్మాలో తనదైన స్థానాన్ని నిలబెట్టుకొందన్న మంత్రి... భవిష్యత్తులో హైదరాబాద్ నగరాన్ని ఫార్మా సిటీ అంతర్జాతీయ పటంలో ప్రత్యేకంగా నిలుపుతుందన్నారు. హైదరాబాద్ నుంచి కరోనాకి అవసరమైన మందుతో పాటు వ్యాక్సిన్ తయారీకి సంబంధించిన ప్రణాళికలు వేగంగా రూపొందుతున్నాయని చెప్పారు. భవిష్యత్తులో ఫార్మాసిటీ ద్వారా ఇలాంటి అనేక సమస్యలకు, వ్యాధులకు ఇక్కడి నుంచి సమాధానం వస్తుందనే నమ్మకం ఉందన్నారు. పరిశ్రమలు, టీఎస్ఐఐసీ, విద్యుత్ శాఖ ఉన్నతాధికారులతో సమావేశమైన మంత్రి కేటీఆర్.. హైదరాబాద్ ఫార్మాసిటీ పనుల పురోగతిపై సమీక్షించారు.
అతిపెద్ద ఫార్మా క్లస్టర్గా హైదరాబాద్
అమెరికాకు చెందిన యూఎస్ఎఫ్డీఏ నుంచి వరుసగా అత్యధిక అనుమతులు పొందుతున్న రాష్ట్రాల్లో తెలంగాణ ఒకటిగా ఉందన్న కేటీఆర్... ప్రపంచంలోనే అతిపెద్ద ఫార్మా క్లస్టర్గా నిలవబోతున్న హైదరాబాద్ ఫార్మా సిటీ... జాతీయ, అంతర్జాతీయ ప్రాధాన్యత కలిగిన ప్రాజెక్టుగా ఉండబోతుందన్నారు. అంతర్జాతీయ ప్రమాణాలకు అనుగుణంగా ఫార్మాసిటీని రూపొందించాలన్న ముఖ్యమంత్రి కేసీఆర్ ఆదేశాల మేరకు... తమ శాఖ పని చేస్తుందని మంత్రి తెలిపారు.
నివేదిక సమర్పించాలి
రానున్న కొద్ది నెలల్లోనే హైదరాబాద్ ఫార్మా సిటీ మొదటి దశ ప్రారంభమయ్యేలా అన్ని చర్యలు తీసుకుంటున్నట్లు అధికారులు తెలిపారు. ఫార్మాసిటీకి కావాల్సిన రోడ్లు, ఇతర మౌలిక వసతులకు సంబంధించిన పనుల పురోగతిని మంత్రి తెలుసుకున్నారు. స్వల్పకాలికంగా సంవత్సరం మొదలుకొని వచ్చే ఐదేళ్లపాటు ఏయే సంవత్సరం, ఏయే కార్యక్రమాలు చేపడతారు, ఎలాంటి పురోగతి సాధించబోతుందో తెలిపే గడువులతో కూడిన ఒక నివేదికను సమర్పించాలని మంత్రి కేటీఆర్ అధికారులను ఆదేశించారు.
బృహత్తర లక్ష్యంతో ముందుకు
ఫార్మా ఉత్పత్తులను తయారుచేసే కంపెనీలు మొదలు అందులో పనిచేసే కార్మికులకు అవసరమైన నివాస సౌకర్యాలు అన్నీ ఉండేలా ఒక స్వయం సమృద్ధి కలిగిన టౌన్షిప్గా ఉండాలన్న బృహత్తర లక్ష్యంతో ముందుకు వెళ్ళాలని అధికారులకు మంత్రి దిశానిర్దేశం చేశారు. హైదరాబాద్ ఫార్మా సిటీలో కేవలం ఉత్పత్తుల తయారీ మాత్రమే కాకుండా... ఫార్మా పరిశోధన, అభివృద్ధి సౌకర్యాలు, లైఫ్ సైన్సెస్ రంగానికి ప్రత్యేకించి ఒక విశ్వవిద్యాలయం, సాధ్యమైనంత ఎక్కువగా గ్రీన్ కవర్ వంటి ప్రత్యేకతలు ఉండబోతున్నాయని కేటీఆర్ వివరించారు.
ఇవీ చూడండి: పాఠశాలల ప్రారంభంపై ఇంకా నిర్ణయం తీసుకోలేదు: విద్యాశాఖ
