సంప్రదాయాలకు పెద్దపీట వేస్తూ... రుచికరమైన ఆహారంతోపాటు.. కావాల్సినంత ఆనందాన్ని పంచేలా స్వీట్ అండ్ కైట్ ఫెస్టివల్ను నిర్వహిస్తున్నట్లు మంత్రి శ్రీనివాస్ గౌడ్ పేర్కొన్నారు. హరితా ప్లాజాలో స్వీట్స్ అండ్ కైట్ ఫెస్టివల్ పోస్టర్ను విడుదల చేశారు. కార్యక్రమంలో పర్యటక శాఖ కార్యదర్శి బుర్రా వెంకటేశం పాల్గొన్నారు. భాగ్యనగరంలో దేశ విదేశాలతో పాటు వివిధ రాష్ట్రాలకు చెందిన ప్రజలు నివాసం ఉంటున్నారని.. వారందరికీ తమ సొంత ఇంట్లోనే పండుగ చేసుకుంటున్న భావన కలిగించేలా ఈ సారి ఫెస్టివల్ ఏర్పాట్లు ఉంటాయన్నారు.
ఈ నెల 13 నుంచి మూడు రోజులపాటు సికింద్రాబాద్ పరేడ్ గ్రౌండ్స్లో జరగనున్న ఈ ఫెస్టివల్లో సుమారు 15 లక్షల మంది పాల్గొనే అవకాశం ఉన్నట్లు పేర్కొన్నారు. ప్రత్యేకంగా తెలుగు రాష్ట్రాల సంప్రదాయ ఆటలు.. కర్రా బిళ్లా, తొక్కుడు బిళ్ల, గోళీల ఆటల వంటివాటిని కూడా ఈ సారి ఇందులో భాగం చేస్తుండటం విశేషం. కైట్ ఫెస్టివల్కి వచ్చే వారు గుడ్డ సంచీలు, సొంతంగా వాటర్ బాటిళ్లను తెచ్చుకోవటం ద్వారా ప్లాస్టిక్ వినియోగాన్ని తగ్గించాలని విజ్ఞప్తి చేశారు.
ఇవీ చూడండి: దయచేసి వినండి మీరు వెళ్లాల్సిన రైళ్లన్ని రద్దీగా ఉన్నాయి!
