మారుతున్న తీరు.. రెండో పెళ్లికి సై అంటున్నారు వీరు..

పెళ్లి ప్రతి ఒక్కరి జీవితాల్లో మధురమైన ఘట్టం. వేరు వేరు జీవితాల నుంచి ఒకే జీవితంలోకి ప్రవేశించే వేడుక. ఇరు కుటుంబాలకు పండుగ. విహహాం అంటే పవిత్ర బంధం. వివాహం అంటే జీవితంలో ఒక్కసారి జరిగే శుభకార్యం. అది ఒకప్పుడు. ఇప్పుడు కాలం మారింది. నచ్చకపోతే విడిపోవడమే. అది పెద్దలు కుదిర్చిన పెళ్లి కావచ్చు లేక ప్రేమ పెళ్లి కావచ్చు. విడాకులిచ్చి మరొకరిని వరించడమే. ఇలాంటి వారి సంఖ్య నానాటికి పెరుగుతోంది.

పెళ్లి... అన్ని కుటుంబాల్లో పెద్ద వేడుక. యువతీ యువకులకు బంగారు కల. జీవిత భాగస్వామిపై ఎన్నో అంచనాలు. ఆశలు. పెళ్లంటే జీవితంలో ఒక్కసారే జరిగే శుభకార్యం. అది ఒకప్పుడు. కాలం మారింది. వధూవరుల ఆలోచనలు మారాయి. నచ్చకపోతే విడిపోవడమే. మరొకరిని వరించడమే. ఇదీ నేటి ధోరణి. ఒకప్పుడు రెండో పెళ్లంటే ఆక్షేపణ. ఇప్పుడది తప్పు కాదు. తొలి వివాహం విఫలమైతేనేం? అదొక పీడకలగా మర్చిపోతారు. మళ్లీ పెళ్లికి సిద్ధమవుతారు. ఇలాంటి వారి సంఖ్య పెరుగుతోంది. ఇందులో నడి వయసు వారూ ఉంటున్నారు.

రెండో పెళ్లి ఎందుకంటే...

ఇప్పుడన్నీ చిన్న కుటుంబాలే. పిల్లలు గారాబంగా పెరుగుతున్నారు. అమ్మాయిలు పుట్టింట్లో దర్జాగా జీవిస్తారు. అత్తగారింట్లోనూ అలా లేకపోతే సమస్యే. ఏ మాత్రం తేడా వచ్చినా గొడవలే. చినికి చినికి గాలివానవుతుంది. విడాకులకు, పునర్వివాహానికి దారితీస్తుంది.కొందరు యువతీ యువకులు పెళ్లి ఆలస్యం చేస్తారు. చదువు, కెరీర్‌పై దృష్టి సారిస్తారు. అలా 30-35 ఏళ్లు వచ్చేస్తాయి. అప్పుడు సంబంధం దొరకడం కష్టమే. మొదటి పెళ్లి వారు దొరకరు. రెండో పెళ్లి వారైనా సరే అనాల్సిన స్థితి.

పరిచయ వేదికలకు గిరాకీ

పునర్వివాహం కోరే వారి కోసం ప్రత్యేక వేదికలుంటాయి. వీటిని ఆశ్రయించే వారు అధికంగానే ఉంటున్నారు. ‘మా వద్దకు నెలకు సుమారు 30 మంది రెండో పెళ్లి సంబంధం కోసం వస్తున్నారు’... అని కొన్ని పరిచయ వేదికల ప్రతినిధులు చెప్పారు. ఆన్‌లైన్‌ వేదికల్లోనూ ‘రెండో పెళ్లి’ విభాగాలున్నాయి. రెండో పెళ్లి చేసుకోవాలనుకునేవారు మరింత జాగ్రత్త పడుతున్నారు. వీలైనన్ని షరతులూ పెడుతున్నారు. మంచి సంబంధం కోసం ఏజెంట్లకు అధిక కమీషన్‌ ఆశ చూపే వారూ లేకపోలేదు.

జాగ్రత్త... జాగ్రత్త...

కొంతమంది అబ్బాయిలు ఆస్తికి ప్రాధాన్యమిస్తారు. అమ్మాయి ధనవంతురాలో, మంచి ఉద్యోగస్తురాలో అయితే చాలు. వాటి కోసమే ముందుకొచ్చే అబ్బాయిలుంటారు. ఇలాంటి వారి పట్ల అప్రమత్తంగా ఉండాలి. వేధింపుల వంటి నేరాలవల్ల తొలి వివాహం విఫలమవ్వచ్చు. అలాంటి పురుషులు రెండోపెళ్లి సమయంలో నిజం చెప్పరు. వీరి విషయంలోనూ నిశిత పరిశీలన అవసరం.

ఏడాదికే పునర్వివాహం!

ఆమె విద్యావంతురాలు. ప్రభుత్వంలో ఉన్నతోద్యోగి. అతడు సాఫ్ట్‌వేర్‌ ఇంజినీర్‌. ఇద్దరిదీ మంచి స్థితి. పెద్దలు వారికి పెళ్లి చేశారు. కానీ ఏడాదికే విభేదాలు. ‘అతడికి రాత్రంతా కంప్యూటర్‌పై పని. పైగా కొన్ని విషయాలు ముందే చెప్పలేదు’... ఇవీ ఆమె ఫిర్యాదులు. విడాకులకు నిర్ణయించుకున్నారు. కేసు కోర్టులో ఉంది. ఈలోగానే ఒప్పంద పత్రం రాసుకున్నారు. పెద్దల సమక్షంలో విడిపోయారు. ఇప్పుడు రెండో పెళ్లి ప్రయత్నంలో పడ్డారు.

రూ.కోట్ల ఆస్తి ఉన్నా...

ఆ యువతి స్వస్థలం ఏలూరు. తెలిసిన వారి అబ్బాయితో పెళ్లి చేశారు. ఇరు కుటుంబాలకు రూ.కోట్ల ఆస్తి ఉంది. ఏం లాభం? ఏడాదికే గొడవలు. విడాకుల పత్రాలు రాసుకున్నారు. ఇద్దరూ రెండో పెళ్లి చేసుకున్నారు. ఆమె రెండో భర్త సాఫ్ట్‌వేర్‌ ఉద్యోగి. అతడికీ అది రెండో వివాహమే.

విద్యావంతులే ఎక్కువ

పిల్లలున్న వారు కూడా పునర్వివాహ యత్నాలు చేస్తుంటారు. రెండో భాగస్వామి నుంచి ఆ పిల్లలకు భద్రత లభిస్తుందో లేదో చూసుకోవాలి. విద్యావంతుల్లోనే పునర్వివాహాలు ఎక్కువగా ఉంటున్నాయి. చిన్నచిన్న గొడవలొచ్చినా దంపతులు సర్దుకుపోవాలి. రెండో పెళ్లి తర్వాత సంతోషంగా ఉండేవారూ అధికమే. నేటి యువతకు చిన్న వయసులోనే పెద్ద ఉద్యోగాలొస్తున్నాయి. ఆర్థిక స్వాతంత్య్రం లభిస్తోంది. తము కోరుకున్నట్టే ఉండాలనుకుంటున్నారు. భాగస్వామిని మార్చాలనుకోవడానికి ఇదీ కారణమే. ప్రస్తుతం సమాజం దీన్ని తప్పుపట్టట్లేదు. రెండో పెళ్లి చేసుకున్నవారు గతాన్ని మర్చిపోవాలి. మొదటి పెళ్లి నాటి విషయాలను ఇద్దరూ తవ్వుకోకూడదు.

-సుజాత, కుటుంబ కౌన్సెలర్‌

ఇదీ చూడండి: డెత్​ వారెంట్​పై స్టే కోరుతూ 'నిర్భయ' దోషుల పిటిషన్