Hyderabad Devotee Help Golden Coating Kalasam : షిర్డీ సాయి ఆలయం లోపలి కలశానికి బంగారు తాపడం చేయించిన హైదరాబాద్‌ వాసి

Hyderabad Devotee Help Golden Coating Kalasam : షిర్డీలో సాయిబాబాకి హైదరాబాద్​కు చెందిన భక్తుడు విజయ్‌కుమార్‌.. బాబాపై కలశం లోపలి భాగానికి బంగారు తాపడం చేయించారు. గతంలోనూ ఆయన ఆలయంలోని పలురకాల వస్తువులకు బంగారంతో తాపడం చేయించేదుకు సహాయం చేసినట్లు సాయిసంస్థాన్‌ అధికారులు తెలిపారు.

Hyderabad Devotee Help Golden Coating Kalasam at Shirdi Saibaba Temple : షిర్డీ సాయిబాబాకు (Shirdi Saibaba) దేశ, విదేశాల్లోనూ భక్తులు ఉన్నారు. ఈ క్రమంలో ఆలయానికి కానుకలు వెల్లువెత్తున్నాయి. తాజాగా బాబాకు హైదరాబాద్‌కు చెందిన భక్తుడు విజయ్‌కుమార్‌ 2007లో విరాళం రూపంలో బాబా సమాధి.. దాని చుట్టూ ఉన్న నాలుగు గోపురాలకు బంగారు తాపడం చేయించారు. ఇప్పుడు ఆయన.. సాయిబాబా కలశం లోపలి భాగానికి బంగారు తాపడం చేయించారు. గతంలో 2006లో సాయిబాబాకు బంగారు పాదుకలు, బంగారు జరీ, ఫూల్‌పాత్ర.. 2008లో బంగారు చిలింపీలను విజయ్‌కుమార్‌ షిర్డీ ఆలయానికి విరాళంగా ఇచ్చారు.

ఈ క్రమంలోనే 2010లో గురుసంస్థాన్‌ ఆలయ బయటి వైపు బంగారు తాపడం.. 2015లో సాయి మందిరం పరిసరాల్లోని.. ఉప ఆలయాలైన శనిదేవుడి మందిరం, వినాయక మందిరం, మహాదేవ్ మందిరాలకు బంగారు తాపడం చేయించారు. మార్చి 2023లో చావడిలోని సాయిబాబా విగ్రహం పక్కన ఉన్న రెండు వెండి సింహాసనాలు, నందదీప్, దేవాలయంలోని సింహాసనానికి కూడా బంగారు తాపడం చేయించినట్లు సాయి సంస్థాన్ చీఫ్ ఎగ్జిక్యూటివ్ ఆఫీసర్ పి.శివశంకర్ తెలిపారు.

షిర్డీ ఆలయాన్ని బంగారుమయం చేయడంలో ముఖ్య పాత్ర పోషించిన విజయ్‌కుమార్‌ను.. సాయి సంస్థాన్ సంస్థ ముఖ్య కార్యనిర్వహణాధికారి పి.శివశంకర్‌ ఘనంగా సత్కరించారు. సాయి మందిరంలోని కలశానికి బంగారు తాపడం చేయడానికి ఎంత ఖర్చు అయిందనే విషయంపై మాట్లాడేందుకు విజయ్‌కుమార్ నిరాకరించారు. సాయిబాబాపై తనకు అచంచలమైన నమ్మకం ఉందని.. బాబా ఆశీస్సులతో తాను అభివృద్ధి చెందానని విజయ్‌కుమార్ వివరించారు.

Shirdi Sai Baba Mandir Donation : మరోవైపు షిర్డీ సాయిబాబా ఆలయానికి పెద్దఎత్తున ఆదాయం వచ్చింది. ఏప్రిల్ 25 నుంచి జూన్ 15 వరకు నెలన్నర వ్యవధిలో.. వివిధ రూపాల్లో రూ.47 కోట్ల మేర భక్తులు కానుకలు సమర్పించారు. ఈ వ్యవధిలోనే 26 లక్షల మంది భక్తులు సాయినాథుడ్ని దర్శించుకున్నారు. అంతకుముందు ఏప్రిల్​లో శ్రీరామ నవమి పండగ సందర్భంగా సాయినాథ్ మందిరానికి మూడు రోజుల్లోనే రూ.4 కోట్ల ఆదాయం వచ్చింది. ఆ సమయంలో సాయినాథుడిని దర్శించుకునేందుకు భక్తులు పోటెత్తారు.

శ్రీరామనవమి సందర్భంగా రెండు లక్షల మంది భక్తులు షిర్డీసాయిని దర్శించుకున్నారు. ఈ నేపథ్యంలో పెద్ద సంఖ్యలో బాబాకు కానుకలు సమర్పించారు. శ్రీరామ నవమి సీజన్​లో శ్రీ సాయిబాబా ఆలయం హుండీ ఆదాయం రికార్డు స్థాయిలో నమోదైందని ముఖ్య కార్యనిర్వాహక అధికారి (సీఈఓ) రాహుల్ జాదవ్ తెలిపారు. వివిధ మార్గాల్లో భక్తులు తమ కానుకలను సాయి బాబాకు సమర్పించుకున్నారని చెప్పారు. హుండీ బాక్స్, హుండీ కౌంటర్, ఆన్​లైన్ డొనేషన్లన్నింటినీ లెక్కించగా.. మూడు రోజుల్లోనే రూ.4 కోట్ల ఆదాయం వచ్చిందని రాహుల్ జాదవ్ పేర్కొన్నారు.