ఈ నూనె రాస్తే కీళ్ల నొప్పులు తగ్గిపోయే ఛాన్స్! వంటల్లో వాడితే గుండెకు మంచిదట!

-ప్రసవానంతరం వచ్చే స్ట్రెచ్‌ మార్క్‌లు కూడా పోతాయట! -జలుబు, దగ్గు ఇన్​ఫెక్షన్లను తగ్గిస్తుందని నిపుణుల వెల్లడి

Mustard Oil Benefits: ఆవ నూనెను వంటలోకి కాకుండా బియ్యం, పప్పులు నిల్వ ఉంచడానికి, కీటకాలు చేరకుండా ఉండేదుకు వాడుతుంటారు. అయితే, ఇది కేవలం రుచిని ఇవ్వడమే కాకుండా ఆరోగ్యానికి కూడా ఎంతో మేలు చేస్తుందని నిపుణులు చెబుతున్నారు. దీనిలో ఒమెగా 6, ఒమెగా 3, ఫ్యాటీ యాసిడ్స్‌, విటమిన్‌ ఇ, మినరల్స్‌, ఐరన్‌ వంటి పోషకాలు సమృద్ధిగా ఉంటాయని వివరిస్తున్నారు. Asian Journal of Dairy and Food Research లో ప్రచురితమైన "Medicinal Qualities of Mustard Oil and Its Role in Human Health against Chronic Diseases: A Review" అనే అధ్యయనంలోనూ ఈ విషయం తేలింది. ఈ నేపథ్యంలోనే ఆవ నూనెతో కలిగే ప్రయోజనాలు ఏంటో ఇప్పుడు తెలుసుకుందాం. (రిపోర్ట్ కోసం ఇక్కడ క్లిక్ చేయండి)

మెడ, కండరాల నొప్పులు: ముఖ్యంగా డెస్క్‌ ఉద్యోగాలు చేస్తున్నవారికి గంటల కొద్దీ కూర్చొనే పని చేస్తుంటారు. ఫలితంగా మెడ, కండరాలు, కీళ్ల నొప్పులతో బాధపడుతుంటారు. అలాంటి వాళ్లు నొప్పి ఉన్నచోట ఆవనూనె రాసి, వృత్తాకారంలో మసాజ్‌ చేస్తే ఉపశమనం లభిస్తుందని నిపుణులు చెబుతున్నారు.

చర్మ సమస్యలు: ఇంకా ఆవనూనెలో ఉండే ఎ, ఈ, కె విటమిన్లు చర్మ సమస్యలకూ చెక్‌ పెడతాయని వెల్లడిస్తున్నారు. ముఖ్యంగా చర్మం పొడిబారడం, పొలుసులు రావడం వంటి సమస్యలు ఉన్నవారికి బాగా పనిచేస్తుందని అంటున్నారు. స్నానం చేసిన తర్వాత దీన్ని రాసుకుంటే సహజ నూనెలు కోల్పోకుండా కాపాడుతుందని వివరిస్తున్నారు.

ఒత్తిడి, ఆందోళన: ఆవ నూనెతో మసాజ్‌ చేయడం వల్ల ఒత్తిడి, ఆందోళన దూరమవుతాయని నిపుణులు అంటున్నారు. ఫలితంగా మంచి నిద్ర పడుతుందని అధ్యయనాలు చెబుతున్నాయి.

జలుబు, దగ్గు సమస్యలకు చెక్: ఆవనూనెతో జలుబు, దగ్గు, ముక్కు దిబ్బడ, వంటి సమస్యల నుంచి ఉపశమనం లభిస్తుందని నిపుణులు చెబుతున్నారు. ఇందుకోసం రెండు చుక్కల ఆవనూనెను వేడినీటిలో వేసి ఆవిరి పట్టాలని సూచిస్తున్నారు. ఇంకా కఫం ఉన్నప్పుడు రెండు వెల్లుల్లి రెబ్బలు ఆవనూనెలో వేసి మరిగించి ఆ నూనెను రాత్రి సమయంలో ఛాతి భాగంలో రాసి మర్దనా చేస్తే సరిపోతుందని అంటున్నారు.

గుండెకు మంచిది: ఆవ నూనెలో ఉండే ఒమేగా 3, 6, ఫ్యాటీ యాసిడ్‌లు చెడు కొలెస్ట్రాల్‌ పెరగకుండా చేస్తాయని నిపుణులు అంటున్నారు. అందువల్ల వంటల్లో లేదా సలాడ్‌లో తీసుకోవడం వల్ల గుండె సమస్యలు దాదాపు 50 శాతం నియంత్రణలో ఉంటాయని వివరిస్తున్నారు. 2004లో Journal of Nutritionలో ప్రచురితమైన "Mustard oil reduces cholesterol and prevents atherosclerosis in rabbits" అనే అధ్యయనంలోనూ ఈ విషయం తేలింది.

దంతాల ఆరోగ్యానికి: దంత సమస్యలను దూరం చేయడంలోనూ ఆవనూనె బాగా పనిచేస్తుందని నిపుణులు చెబుతున్నారు. చిగుళ్ల నొప్పి నివారణకు అర టీ స్పూన్‌ ఉప్పు, రెండు చుక్కల ఆవనూనె, చిటికెడు పసుపు కలిపి దంతాలను శుభ్రపరుచుకోవాలని సూచిస్తున్నారు. ఇలా వారానికి కనీసం రెండు సార్లు చేస్తే చక్కని ఫలితం ఉంటుందని వెల్లడిస్తున్నారు.

కీళ్ల నొప్పులు: కండరాల నొప్పి, కీళ్ల నొప్పుల నుంచి ఉపశమనం కలిగించడానికి ఆవనూనె దోహదం చేస్తుందని నిపుణులు చెబుతున్నారు. ఇందులో ఉండే ఒమేగా 3, ఫ్యాటీ యాసిడ్స్‌ శరీరంలో రక్త ప్రసరణను మెరుగుపరిచి.. వాపు, నొప్పిని తగ్గిస్తాయని వెల్లడిస్తున్నారు. ఇంకా ఆవనూనెను గోరువెచ్చగా వేడి చేసి నొప్పి ఉన్న చోట క్రమం తప్పకుండా మర్దనా చేస్తే ఉపశమనం ఉంటుందని అంటున్నారు.

స్ట్రెచ్‌ మార్క్‌లు: ముఖ్యంగా ప్రసవానంతరం ఏర్పడే స్ట్రెచ్‌ మార్క్‌లు పోగొట్టడంలో ఆవ నూనె బాగా పనిచేస్తుందని చెబుతున్నారు. ఇందుకోసం స్పూన్‌ ఆవనూనెలో రెండు చుక్కల ఆలివ్‌ నూనె కలిపి.. రాత్రి నిద్రపోయే ముందు రాయాలని అంటున్నారు. ఇలా రోజూ చేస్తే చక్కని ఫలితం ఉంటుందని వివరిస్తున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.