HC hearing on Telangana floods : 'వరదల్లో గల్లంతైన వారిని గుర్తించేందుకు ఏం చేశారు..? భూపాలపల్లి జిల్లాలో మృతుల వివరాలు తెలపాలి'

Highcourt on flood relief measures : రాష్ట్రంలో భారీ వరదల సమయంలో గల్లంతైన వారిని గుర్తించేందుకు ప్రభుత్వం ఏయే చర్యలు తీసుకుందో వివరించాలని హైకోర్టు ఆదేశించింది. అలాగే భూపాలపల్లి జిల్లాలో వరదలకు మృతి చెందిన వారి వివరాలు తెలపాలని పేర్కొంది. భారీ వర్షాల నేపథ్యంలో ప్రభుత్వం తీసుకున్న వరద సహాయక చర్యలపై చెరుకు సుధాకర్ వేసిన పిటిషన్‌పై హైకోర్టులో ఇవాళ విచారణ సాగింది.

High Court comments on flood relief measures : వరద ప్రభావిత ప్రాంతాల్లో సహాయక చర్యలపై హైకోర్టులో ఇవాళ కూడా విచారణ సాగింది. చెరుకు సుధాకర్ ఈ పిటిషన్‌ వేశారు. వరదల సమయంలో మృతి చెందిన కొందరి వివరాలను ప్రభుత్వ నివేదికలో ప్రస్తావించలేదన్న పిటిషనర్‌ కోర్టుకు వివరించారు. వరద విషయంలో ముందుగా హెచ్చరికలున్నా.. ప్రభుత్వం స్పందించలేదని పేర్కొన్నారు.

విషజ్వరాల నియంత్రణకు ఇంత వరకు చర్యలు చేపట్టలేదని పిటిషనర్‌ చెరుకు సుధాకర్‌ తరఫు న్యాయవాది వివరించారు. వాదనలు విన్న హైకోర్టు గల్లంతైన వారిని గుర్తించేందుకు ప్రభుత్వం ఏయే చర్యలు తీసుకుందో చెప్పాలని ప్రశ్నించింది. అలాగే భూపాలపల్లి జిల్లాలో మృతుల వివరాలను తెలపాలని కోరింది. కడెం ప్రాజెక్టు సమీప ప్రజల రక్షణకు చేపట్టిన చర్యలను అడిగి తెలుసుకుంది.

Telangana Govt on flood relief measures : స్పందించిన ప్రభుత్వ తరపు న్యాయవాది.. వర్షాలకు 41మంది మృతి చెందారని కోర్టుకు తెలిపారు. 1.59లక్షల ఎకరాల్లో పంట నష్టం జరిగిందని న్యాయస్థానానికి వివరించారు. రెండు రోజుల్లో మరో నివేదిక ఇస్తామని ప్రభుత్వం ఉన్నత న్యాయస్థానానికి తెలిపింది. ఇరు వాదనలను విన్న హైకోర్టు విచారణను శుక్రవారానికి వాయిదా వేసింది.

మరోవైపు ముంపు ప్రాంతాలు, వరద బాధిత ప్రాంతాల్లో సహాయక చర్యలు సరిగా జరగడం లేదంటూ కాంగ్రెస్ ఇవాళ గవర్నర్​ తమిళి సైని కలిసి ఫిర్యాదు చేసింది. అటు గవర్నర్ కూడా త్వరలో వరదలతో నష్టపోయిన జిల్లాల్లో పర్యటించాలని నిర్ణయించారు.

Cabinet decision on flood relief measures : వరదలు, పంటనష్టంపై రాష్ట్ర ప్రభుత్వం నిన్న కీలక నిర్ణయాలు తీసుకుంది. ముఖ్యమంత్రి కేసీఆర్‌ అధ్యక్షతను సోమవారం జరిగిన కేబినేట్‌ సమావేశంలో వరద బాధితులకు తక్షణ సాయం కింద రూ.500 కోట్లు విడుదల చేయాలని మంత్రి వర్గం నిర్ణయించింది. వరదలకు మృతి చెందిన 40 మందికి పరిహారం అందించాలని అధికారులను ఆదేశించింది. పంట పొలాల్లో ఇసుక మేటలపై నివేదిక ఇవ్వాలని కలెక్టర్లకు ఇప్పటికే ఆదేశాలు జారీ చేసినట్లు కేబినేట్ భేటీ అనంతరం మంత్రి కేటీఆర్‌ వివరించారు.

అలాగే వరదలకు తెగిన రోడ్లు, కల్వర్టులు మరమ్మతులు చేయాలని మంత్రి వర్గం నిర్ణయించింది. వరద సమయంలో ప్రభుత్వం చేసిన సహాయక చర్యలు గురించి వివరించిన కేటీఆర్‌.. సుమారు 27 వేల మంది ముంపు బాధితులను పునరావాస కేంద్రాలకు తరలించామని పేర్కొన్నారు. ఇద్దరు ఉద్యోగులు వరదల సమయంలో అద్భుతంగా విధులు నిర్వర్తించారని కొనియాడారు. ఆగస్టు 15న ఇరువురికి ప్రభుత్వ సత్కారం చేయాలని నిర్ణయించినట్లు తెలిపారు. ఆశ్రమ పాఠశాలలో 40 మంది పిల్లలను కాపాడిన టీచర్‌ను అభినందించారు.

ఇవీ చదవండి: