పై నుంచి వస్తున్న వరదకు.. రాష్ట్రంలో పలు జిల్లాల్లో కురుస్తున్న వర్షాలు తోడవ్వటం వల్ల కృష్ణ, గోదావరి ప్రాజెక్టులు జలకళను సంతరించుకున్నాయి. జూరాల నుంచి వరద ప్రవాహం కొనసాగటం వల్ల శ్రీశైలం గేట్లను ఎత్తి దిగువకు విడుదల చేస్తున్నారు. నాగార్జున సాగర్‌ ఎగువ ప్రాంతం నుంచి వరద కొనసాగుతోంది. జలాశయం నీటి మట్టం 589.80 అడుగుల వద్ద ఉండటం వల్ల... వచ్చిన వరదను వచ్చినట్లుగా కిందకు వదులుతున్నారు. శ్రీశైలం నుంచి లక్షా 29 వేల 716 క్యూసెక్కుల వరద వస్తుండగా.. సాగర్‌ 6 గేట్లను 10 అడుగుల మేర ఎత్తి 89 వేల 838 క్యూసెక్కులను దిగువకు విడుదల చేస్తున్నారు.
నిజామాబాద్ జిల్లా శ్రీరాంసాగర్ ప్రాజెక్టుకు మహారాష్ట్ర నుంచి వరద ప్రవాహం కొనసాగుతోంది. ప్రాజెక్టు పూర్తి స్థాయి నీటిమట్టం 1091 అడుగులకు గాను... 1090.6 అడుగులు చేరుకుంది. 88.11 టీఎంసీల నీరు నిల్వ ఉంది. 25 వేల 982 క్యూసెక్కుల వరద వస్తుండగా.. వరద కాలువ ద్వారా 17 వేల 493 క్యూసెక్కులను దిగువకు విడుదల చేస్తున్నారు. కామారెడ్డి జిల్లాలో కురిసిన వర్షాలకు.. తాడ్వాయి మండలంలోని సంగోజివాడి, కాళోజీవాడి గ్రామాల మధ్య వాగు ఉద్ధృతితో రాకపోకలు నిలిచిపోయాయి.
ఖమ్మం జిల్లా వైరా నియోజకవర్గంలో భారీ వర్షాలకు జలాశయాలు పొంగి ప్రవహిస్తున్నాయి. వైరా జలాశయం 18 అడుగుల పూర్తి స్థాయి నీటిమట్టం దాటింది. ఏన్కూరు, కొణిజర్ల మండలాల మధ్యలో వాగులు పొంగిప్రవహించటం వల్ల ఖమ్మం ప్రధాన రహదారిపై రాకపోకలు స్తంభించాయి. సూర్యాపేట జిల్లాలో కురిసిన వర్షానికి.. పాలేరు ఉద్ధృతంగా ప్రవహిస్తోంది. ఇటీవల కురిసిన వర్షాలతో పాటు.. ఎస్సారెస్పీ నీటితో నిండుకుండను తలపిస్తున్న చెరువులు... కొద్దిపాటి వర్షానికే మత్తడి దాటుతున్నాయి. తుంగతుర్తి మండలం అన్నారం గ్రామానికి చెందిన చంద్రయ్య అనే వృద్ధుడు... వాగు దాటుతుండగా వరదలో కొట్టుకుపోయ్యాడు. గల్లంతైన చంద్రయ్య కోసం గాలిస్తున్నారు. తుంగతుర్తి నియోజకవర్గంలో కురిసిన వర్షానికి.. సుమారు వెయ్యి ఎకరాలలో పంట దెబ్బతింది.
ఇదీ చదవండి: ఎడతెరిపిలేని వర్షం... పొంగిపొర్లుతున్న వాగులు, వంకలు
