RAIN: హైదరాబాద్​లో పలు ప్రాంతాల్లో భారీ వర్షం

హైదరాబాద్​ నగరంలోని పలు ప్రాంతాల్లో సాయంత్రం భారీ వర్షం కురిసింది. ఈదురు గాలులతో కూడిన వాన వల్ల పలుచోట్ల విద్యుత్​ సరఫరాకు అంతరాయం ఏర్పడింది. రోడ్లపై నీరు నిలిచి వాహనదారులు ఇబ్బందులుపడ్డారు.

హైదరాబాద్ నగరంలోని పలు ప్రాంతాల్లో ఈదురుగాలులతో కూడిన భారీ వర్షం కురిసింది. ఫలితంగా మూడు రోజులుగా ఉక్కపోతతో ఇబ్బందిపడుతోన్న నగరవాసులు ఉపశమనం పొందారు. ఉదయం నుంచి వేడిగా ఉన్న వాతావరణం.. సాయంత్రానికి కురిసిన జోరువానతో ఒక్కసారిగా చల్లబడింది.

నగరంలోని కోఠి, సుల్తాన్​బజార్, అబిడ్స్, నాంపల్లి, బషీర్​బాగ్, కింగ్​కోఠి, లిబర్టీ, లక్డీకాపూల్​, నారాయణగూడ, హిమాయత్​నగర్ తదితర ప్రాంతాల్లో ఉరుములు, మెరుపులతో కూడిన వాన పడింది. ఖైరతాబాద్‌, పంజాగుట్ట, అమీర్‌పేట, ఎస్‌.ఆర్‌.నగర్‌, బంజారాహిల్స్‌, జూబ్లీహిల్స్‌, సోమాజీగూడ, నారాయణగూడ, కోఠి, బేగంబజార్, అంబర్​పేట, గోల్నాక, నల్లకుంట తదితర ప్రాంతాల్లో మోస్తరు వర్షం కురిసింది. పలు ప్రాంతాల్లో విద్యుత్​ సరఫరా నిలిచిపోయింది.

మరోవైపు భారీ వర్షం కారణంగా రహదారులపైకి నీరు చేరింది. వివిధ పనుల నిమిత్తం బయటకు వచ్చిన వాహనదారులు తడిసి ముద్దయ్యారు. రాకపోకలకు అంతరాయం కలగడంతో తీవ్ర ఇక్కట్లు ఎదుర్కొన్నారు.