నిత్యం యోగా చేయడం వల్ల భౌతిక, మానసిక, ఆధ్యాత్మిక ప్రయోజనాలు చేకురుతాయని గవర్నర్ తమిళిసై సౌందరరాజన్ అన్నారు. భారతీయ మూలాల్లో, వైదిక జీవన పద్ధతుల్లో, మానవుని సంపూర్ణ ఆరోగ్యానికి, ప్రకృతి రక్షణకు అనువైన విధానాలు ఉన్నాయన్నారు. సంపూర్ణ ఆరోగ్యానికి ప్రాచీన భారతీయ జీవనం కీలకమన్నారు. మన జాతీయ సంప్రదాయాన్ని అంతర్జాతీయ కార్యక్రమంగా మార్చిన ప్రధాని మోదీకి గవర్నర్ ధన్యవాదాలు తెలిపారు. రాష్ట్ర ప్రజలకు అంతర్జాతీయ యోగా దినోత్సవ శుభాకాంక్షలు తెలిపారు.
అంతర్జాతీయ యోగా దినోత్సవం సందర్భంగా ఇండియన్ చాంబర్ ఆఫ్ కామర్స్, ఈషా పౌండేషన్ దృశ్యమాధ్యమ సమీక్ష ద్వారా నిర్వహించిన కార్యక్రమంలో రాజ్ భవన్ నుంచి ముఖ్య అతిథిగా గవర్నర్ పాల్గొన్నారు. సంపూర్ణ జీవన శైలి, సహజ ఆహార అలవాట్లు భవిష్యత్ భారత్కు, భూగోళ రక్షణకు విజన్ అన్న అంశపై ప్రసంగించారు.
తన బాల్యాన్ని గుర్తుచేసుకుంటూ.... తన నానామ్మ చేతులు, కాళ్లు కడుక్కుంటేనే తనను ఇంట్లోకి రానిచ్చేవారని... ఇప్పుడు కరోనా వైరస్ కాలంలో అప్పటి అలవాట్లు ఎంత ఆరోగ్యకరమైనవో తెలిసివస్తున్నాయన తమిళిసై వివరించారు.
ప్రస్తుతం ప్రజలు కరెన్సీని లెక్కిస్తున్నారు కానీ క్యాలరీలను లెక్కించడంలేదని... బ్యాంకు బ్యాలన్సును చూసుకుంటున్నారు కానీ లైఫ్ బ్యాలెన్సును చూసుకోవడం లేదని వ్యాఖ్యానించారు. జీవితంలో బ్యాలెన్స్ సరిగా ఉంటేనే బ్యాంకు బ్యాలెన్సుకు అర్ధం ఉంటుందని గవర్నర్ అన్నారు.
మానవుల వినిమయ విధానాలు పర్యావరణానికి ఎంతో ముప్పు కలిగిస్తున్నాయని.... పర్యావరణ హితమైన వినియోగం, జీవనశైలి పెంపొందించుకోకపోతే భూగోళంపై మానవ మనుగడే ప్రశ్నార్ధకమవుతుందని తమిళిసై ఆందోళన వ్యక్తం చేశారు. అడవులు, ప్రకృతి సంపద ఎక్కువుగా ఉన్నప్పడు నేరాల శాతం తక్కువుగా ఉంటుందని కొన్ని అధ్యయనాలు చెప్తున్నాయని అన్నారు.
ఇప్పటికీ తనకు తలనొప్పి లాంటి చిన్న చిన్న ఇబ్బందులు వస్తే వంటగదిలోని సంప్రదాయ దినుసులతో తగ్గించుకుంటానని... వైద్యురాలిని అయినా ఇలాంటి పద్ధతులు పాటిస్తానని తెలిపారు. సంప్రదాయ భారతీయ వంటశాల ఒక చిన్నపాటి వైద్యశాలగా కూడా పనిచేస్తుందని గవర్నర్ వివరించారు.
ఇదీ చూడండి: ఇంటి పన్ను చెల్లించలేదని టీవీ ఎత్తుకెళ్లారు.
