చెరువు, నది దగ్గరకు వెళ్లగానే అందులో షికారు చేయాలన్న సరదా ఉంటుంది. అక్కడే బోటింగ్‌ ఉంటే.. దాంతో పాటు నీళ్లలో మెల్లమెల్లగా కదిలే రెస్టారెంట్ ఉంటే.. నచ్చిన ఆహారం తింటూ... అలాఅలా ప్రయాణిస్తుంటే.. పర్యాటకులకు అదో మధురానుభూతి. అటు పర్యాటకుల్ని ఆకర్షించడంతో పాటు ఇటు పర్యావరణానికి హాని జరగని విధంగా బ్యాటరీతో నడిచే ఎలక్ట్రిక్‌ బోట్లు, ఎలక్ట్రిక్‌ ఫ్లోటింగ్‌ రెస్టారెంట్లను తెలంగాణ పర్యాటకాభివృద్ధి సంస్థ తీసుకురాబోతోంది. టెండర్ల ప్రక్రియ ప్రారంభించింది. తొలుత దుర్గం చెరువు, హుస్సేన్‌సాగర్‌లలో బ్యాటరీ బోట్లు ప్రవేశపెట్టనుంది. దుర్గం చెరువులో ఫ్లోటింగ్‌ రెస్టారెంట్ రానుంది. ఆ తర్వాత రాష్ట్రంలో మరికొన్నిచోట్ల కూడా ఈ తరహా ప్రయోగం చేసే అవకాశాలు ఉన్నట్లు సమాచారం.
దేశంలో తొలిసారి!
జలాశయాల్లో చిన్న, పెద్ద బోట్లు నడిచేందుకు ఇంధనంగా డీజిల్‌ను ఉపయోగిస్తారు. దీని వాడకం ద్వారా వెలువడే కాలుష్యం ఆ జలాశయాలపై ప్రభావం చూపుతుంది. కాలుష్య నియంత్రణలో భాగంగా దేశవ్యాప్తంగా బ్యాటరీతో నడిచే ఎలక్ట్రిక్‌ బస్సులు, కార్లు, ద్విచక్ర వాహనాలు రోడ్డు ఎక్కుతున్నాయి. ఈ నేపథ్యంలో పర్యాటకాభివృద్ధి సంస్థ కూడా బ్యాటరీతో నడిచే ఎలక్ట్రిక్‌ బోట్లు, ఫ్లోటింగ్‌ రెస్టారెంట్లపై దృష్టిపెట్టింది. దుర్గం చెరువులో ఏర్పాటు చేసే ఫ్లోటింగ్‌ రెస్టారెంట్.. దేశంలో తొలిసారి అని అధికారులు చెబుతున్నారు. 80 మంది కూర్చుని ప్రయాణించవచ్చు. ఇందులో వంటగదితో పాటు ఇతర ఏర్పాట్లు ఉంటాయి.
రెండు అంతస్తుల బోటు
హుస్సేన్‌సాగర్‌.. నగరవాసులతో పాటు దేశ, విదేశాల పర్యాటకుల్ని ఆకట్టుకుంటోంది. తీగల వంతెన నిర్మాణంతో దుర్గం చెరువు కనువిందు చేస్తోంది. ఈ రెండు చోట్ల ఒక్కోటి 150 సీట్ల సామర్థ్యంతో ఎలక్ట్రిక్‌ బోట్లను పర్యాటకాభివృద్ధి సంస్థ ప్రవేశపెట్టబోతోంది. అమెరికాలోని న్యూజెర్సీ, శాన్‌ఫ్రాన్సిస్కో సహా విదేశాల్లో అనేక చెరువులు, జలాశయాల్లో ఎలక్ట్రిక్‌ బోట్లు నడుస్తున్నట్లు పర్యాటకాభివృద్ధి సంస్థ అధికారులు చెబుతున్నారు. ఇక్కడ ప్రవేశపెట్టబోతున్న ఎలక్ట్రిక్‌ బోట్లకు ఒక్కోదానికి రూ.రెండు కోట్ల చొప్పున ఉండొచ్చని అధికారులు అంచనా వేస్తున్నారు.
పార్టీలు చేసుకునేలా
కింది అంతస్తులో పుట్టినరోజు వంటి పార్టీలు చేసుకునేలా..పై అంతస్తులో పర్యాటకులు కూర్చునేలా ఎలక్ట్రిక్‌ బోట్లను తీసుకురాబోతున్నట్లు సమాచారం. 15 రోజుల్లో టెండర్ల ప్రక్రియ పూర్తికానుంది. ఎంపికైన గుత్తేదారుకు ఎలక్ట్రిక్‌ బోట్లు, ఎలక్ట్రిక్‌ ఫ్లోటింగ్‌ రెస్టారెంట్ తయారీని పర్యాటకాభివృద్ధి సంస్థ అప్పగించనుంది. ‘ఐదారుగురు ప్రయాణించే ఎలక్ట్రిక్‌ బోట్లు ఈ మధ్య అక్కడక్కడా వచ్చాయి. కానీ 150 మందితో భారీ ఎలక్ట్రిక్‌ బోట్లు ఎక్కడాలేవు. కేరళలో తీసుకువచ్చేందుకు ప్రయత్నిస్తున్నారు’ అని ఓ అధికారి పేర్కొన్నారు.
- సంబంధిత కథనం: కళ్లు మిరుమిట్లు గొలిపే దుర్గం చెరువు అందాలు చూడతరమా?
