వచ్చే నెల నుంచి ప్రారంభమవుతున్న కొత్త వానాకాలం (ఖరీఫ్‌) సీజన్‌ సన్నద్ధతపై కేంద్ర వ్యవసాయ శాఖ వివరాలు కోరింది. ఈ నేపథ్యంలో రాష్ట్రంలో వ్యవసాయ యంత్రాల వినియోగం, అవసరం, లభ్యతపై రాష్ట్ర వ్యవసాయ శాఖ అధ్యయనం చేసి కేంద్రానికి వివరాలు పంపింది. ఇందులో ప్రధానంగా వ్యవసాయ యంత్రాల కొరతను ప్రస్తావించింది.
నివేదికలోని ముఖ్యాంశాలు
రాష్ట్రం ఏర్పడిన తొలి ఏడాది 2014-15లో వానాకాలం, యాసంగి సీజన్లు కలిపి... కోటీ 41 లక్షల ఎకరాల్లో పంటలు సాగయ్యాయి. గతేడాది(2020-21)లో 2.12 కోట్ల ఎకరాల్లో సాగయ్యాయి. గతేడాది వానాకాలం, యాసంగి కలిపి కోటి 6 లక్షల ఎకరాల్లో వరి సాగైంది.
- సాగు విస్తీర్ణం పెరిగే కొద్దీ కూలీల లభ్యత బాగా తగ్గుతోంది. యంత్రాలు అందుబాటులో ఉంటే వేగంగా పనులు పూర్తి కావడంతో పాటు ఖర్చూ తగ్గుతుంది.
- ట్రాక్టర్లు, యంత్రాలు తక్కువ సంఖ్యలో ఉండటంతో ఏటా వాటి కిరాయిలను యజమానులు పెంచేస్తున్నారు. 2019-20తో పోలిస్తే 2020-21లో ఎకరా వరి కోత కిరాయి రూ.300 నుంచి 400 దాకా అదనంగా పెంచారు.
- ప్రతి గ్రామంలో పంటల సాగు విస్తీర్ణాన్ని బట్టి ‘యంత్రాల సేవా కేంద్రాలు’ ఏర్పాటు చేయాలి. తక్కువ ధరలకు యంత్రాలను అద్దెకిస్తే సాగు వ్యయం తగ్గుతుంది. ఈ ఏడాది బడ్జెట్‌లో ప్రభుత్వం రూ.1,500 కోట్లు కేటాయించింది.
వాడుకుని తిరిగిచ్చేలా..
రైతులు యంత్రాలను కొనలేకపోతున్నారు. రైతులతో ఉమ్మడిగా సంఘాల ఏర్పాటుతో లేదా సేవా కేంద్రాల ద్వారా వాటిని వినియోగించుకునేలా చేస్తాం. ఏ రైతుకు ఏ రోజు ఏ యంత్రం అవసరముంటే ఆ రోజు వాడుకుని తిరిగిచ్చేస్తారు. దీనివల్ల అందరికీ అధునాతన యంత్రాలను వినియోగించుకునే వీలు కలుగుతుంది.
-జనార్దన్‌రెడ్డి, కమిషనర్‌, వ్యవసాయ శాఖ
ఇదీ చూడండి: 'కరోనా రెండోదశకు స్వీయ తప్పిదాలే కారణం'
