Fake GST Registrations Telangana : జీఎస్టీ నకిలీ రిజిస్ట్రేషన్‌లతో భారీ ఎత్తున కేంద్ర, రాష్ట్ర ప్రభుత్వాల సొమ్మును దోచేశారు. మరోవైపు దోచేసిన ఆక్రమార్కులపై కొరడా ఝలిపించే పని మొదలైంది. జీఎస్టీ నెట్‌వర్క్‌, రాష్ట్ర జీఎస్టీ ఇంటెలిజెన్స్ విభాగాల ద్వారా.. దేశవ్యాప్తంగా లక్షకుపైగా అనుమానాస్పద జీఎస్టీ రిజిస్ట్రేషన్లు ఉన్నట్లుగా గుర్తించారు. వీటి ద్వారా వేల కోట్ల రూపాయల ఇన్పుట్ టాక్స్ క్రెడిట్ పేరున.. అక్రమార్కులు పొందినట్లుగా ప్రాథమికంగా నిర్ధారించారు.
ఈ నకిలీల అట కట్టించేందుకు.. కేంద్ర, రాష్ట్ర ప్రభుత్వాల జీఎస్టీ అధికారుల సమన్వయం కోసం.. ప్రత్యేకంగా ఒక నోడల్ అధికారిని కేంద్రప్రభుత్వం నియమించింది. అదేవిధంగా రాష్ట్రాల్లో కేంద్ర, రాష్ట్ర జీఎస్టీ అధికారులను సమన్వయం చేసేందుకు.. అటు రాష్ట్రం.. ఇటు కేంద్రం చెరో డిప్యూటీ కమిషనర్ స్థాయి అధికారులను నోడల్ అధికారులుగా నియమించుకున్నారు. తద్వారా ఇరువురు సమన్వయంతో పని చేసేందుకు వెసులుబాటు కల్పించుకున్నారు.
రాష్ట్రంలో 2,900 రిజిస్ట్రేషన్లు : తెలంగాణలో దాదాపు 2,900 రిజిస్ట్రేషన్లు అనుమానాస్పదంగా ఉన్నట్లు.. జీఎస్టీ అధికారులు గుర్తించారు. వాటికి సంబంధించి క్షేత్రస్థాయిలో పరిశీలన చేసే కార్యక్రమం కొనసాగుతోంది. ఇప్పటివరకు రాష్ట్రంలో 2,300 రిజిస్ట్రేషన్లను పరిశీలించారు. ఇందులో దాదాపు 650 నకిలీవని తేల్చారు. ప్రధానంగా రిజిస్ట్రేషన్ చేసినప్పుడు చూపిన అడ్రస్‌లో ఆ సంస్థ లేకపోవడం.. ఉన్నప్పటికి వ్యాపార లావాదేవీలు చేయకుండా కాగితాల మీదనే వ్యాపారం చేసినట్లు చూపిస్తున్నారు.
Authorities Action on Fake GST Registrations : తద్వారా రిటర్న్‌లు వేసి.. ఐటీసీ తీసుకోవడం లాంటివి ఇందులో ఉన్నట్లు అధికారులు తేల్చారు. ఈ 650 బోగస్ జీఎస్టీ రిజిస్ట్రేషన్ల ద్వారా దాదాపు రూ.1120 కోట్లు ఇన్పుట్ టాక్స్ క్రెడిట్ రూపేనా ప్రభుత్వ సొమ్మును దోచేసినట్లు గుర్తించారు. మరోవైపు బ్యాంకు ఖాతాల్లో ఉన్న రూ.162 కోట్ల ఇన్పుట్ టాక్స్ క్రెడిట్ మొత్తాన్ని అధికారులు సీజ్ చేశారు.
అధికారుల కసరత్తు : ప్రభుత్వ సొమ్మును కాజేసిన సంస్థలపై ఎలాంటి చర్యలు తీసుకోవాలన్న దానిపై.. అధికారులు కసరత్తు చేస్తున్నారు. ఇందుకోసం న్యాయ సలహా తీసుకొని ముందుకు వెళ్లాలని యోచిస్తున్నారు. ఇందులో కేంద్ర, రాష్ట్ర ప్రభుత్వాలు రెండు కూడా నష్టపోయాయి. దీంతో ఇందుకు సంబంధించి పూర్తిస్థాయిలో అధ్యయనం చేసిన తర్వాత.. చర్యలు ఉంటాయని అధికారులు హెచ్చరిస్తున్నారు. ఈ బోగస్ జీఎస్టీ రిజిస్ట్రేషన్‌పై దేశవ్యాప్తంగా క్రిమినల్ చర్యలు తీసుకోవడానికి.. వారి వద్ద నుంచి ఇన్పుట్ టాక్స్ క్రెడిట్ మొత్తాన్ని వసూలు చేయడానికి చర్యలు కఠినంగా ఉండాల్సి ఉంటుందని అధికారులు స్పష్టం చేస్తున్నారు.
Telangana Govt Action on GST Fraud Registrations : మరోవైపు చాలామంది వ్యాపారులు కొనుగోలు చేసిన వస్తువులకు బిల్లులు ఇవ్వడం లేదని.. జీఎస్టీ ఎగవేతకు పాల్పడుతున్నారని ఫిర్యాదులు వచ్చాయి. దీనిపై కేంద్ర, రాష్ట్ర జీఎస్టీ అధికారులు చర్యలకు ఉపక్రమించారు. రాష్ట్రంలోని 12 వాణిజ్య పనులు శాఖ డివిజన్లు ఉండగా.. 120 సర్కిల్ పరిధిలో పది మందికి తక్కువ లేకుండా... వ్యాపారుల వద్ద వివిధ రకాల వస్తువులు కొనుగోలు చేయాలని ఆదేశించారు.
ఇందులో భాగంగా గత వారం పది రోజులుగా ఈ కార్యక్రమం అమలు జరుగుతోంది. కొనుగోలు చేసిన వస్తువుకు సంబంధించి బిల్లులు ఇవ్వనట్లయితే వారిపై కేసు నమోదు చేసి రూ.10,000 జరిమానా విధిస్తున్నట్లు అధికారులు తెలిపారు. ఇవే కాకుండా వ్యాపార, వాణిజ్య సంస్థలు నిర్వహిస్తున్న వ్యాపార లావాదేవీలపై అనుమానాలు ఉన్నట్లయితే సంబంధిత సంస్థలపై దాడులు నిర్వహించేందుకు జీఎస్టీ యంత్రాంగం సిద్ధమవుతోంది.
ఇవీ చదవండి:
