Rachakonda CP Sudheer Babu On Meerpet Murder Case : సంచలనం సృష్టించిన మీర్పేట్ హత్య కేసులో నిందితుడు గురుమూర్తి హత్య చేసిన విధానం చూసి పోలీసులే ఆశ్చర్యపోయారు. ఇవాళ గురుమూర్తిని అరెస్ట్ చేసినట్లు ప్రకటించిన పోలీసులు మీడియా సమావేశం ఏర్పాటు చేశారు. రాచకొండ సీపీ సుధీర్ బాబు హత్యకు సంబంధించిన వివరాలు తెలిపారు.
భార్య భర్తల మధ్య గొడవ : సంచలనం సృష్టించిన మీర్పేట్ వెంకట మాధవి హత్య కేసులో నిందితుడు గురుమూర్తికి ఎలాంటి పశ్చాత్తాపం కనిపించడం లేదని రాచకొండ సీపీ సుధీర్ బాబు వెల్లడించారు. కేసు దర్యాప్తులో ఆధారాలు సేకరించేందుకు సిబ్బంది తీవ్రంగా శ్రమించాల్సి వచ్చిందని సీపీ అన్నారు. ఈ కేసు విచారణ చేస్తున్న సమయంలో నివ్వెరపోయామన్నారు. క్షణికావేశంలో చేసిన హత్య కాదని పథకం ప్రకారమే హత్య చేశాడని అన్నారు. గురుమూర్తి స్వతహాగానే క్రూరుడని ఆయన వివరించారు.
సంక్రాంతి పండగకు మాధవి, గురుమూర్తి తమ పిల్లల్ని తీసుకుని బంధువుల ఇంటికి వెళ్లారని సీపీ సుధీర్ బాబు అన్నారు. 15న పిల్లల్ని బంధువుల ఇంటి వద్దే వదిలేసి వెంకటమాధవి, గురుమూర్తి రాత్రి 10.41 గంటలకు ఇంటికి చేరుకున్నట్లు సీసీటీవీ ఫుటేజ్లో గుర్తించామన్నారు. 16న ఉదయం 8 గంటలకు ఆమెతో అకారణంగా గొడవ పెట్టుకొని మాధవి తలను గోడకేసి కొట్టి కింద పడిపోయిన తర్వాత గొంతు నులిమి హతమార్చాడని దర్యాప్తులో తేలిందని తెలిపారు.
ఇంట్లో ఉన్న కత్తితో కాళ్లు, చేతులు, శరీరం, తల నాలుగు భాగాలుగా కట్ చేశాడని, ఉదయం 10 గంటల నుంచి సాయంత్ర గంటల వరకూ మృతదేహాన్ని ముక్కలు చేసినట్టు గుర్తించామని సీపీ తెలిపారు. వాటర్ హీటర్ నీళ్లు మరిగించి శరీర భాగాలను ఉడక బెట్టాడని, ఆ తర్వాత వాటిని స్టవ్పై పెట్టి కాల్చాడని, రోకలి బండతో ఆ భాగాలను దంచి పొడి చేశాడని, ఆ పొడిని ప్లాస్టిక్ బకెట్లో తీసుకెళ్లి జిల్లెలగూడ చెరువులో పోశాడని విచారణలో తెలిందని చెప్పారు.
"ఇది క్షణికావేశంలో చేసిన హత్య కాదు. పక్కా ప్లాన్‌తో చేసిన హత్య, ఆధారాలు లేకుండా చేసేందుకే శవాన్ని ఉడకబెట్టి కాల్చాడు. భార్యను క్రూరంగా చంపిన గురుమూర్తి మామూలుగానే ఉన్నాడు. గురుమూర్తికి కచ్చితంగా కఠినమైన శిక్ష పడేలా చేస్తాం." - సుధీర్ బాబు, రాచకొండ సీపీ
మనిషి మంచోడు, కానీ! - గురుమూర్తి గురించి ఇరుగుపొరుగు ఆసక్తికర విషయాలు
