కాంగ్రెెస్ స్టిక్కరింగ్ - బీజేపీ కండువా - ఈ 'ఎమ్మెల్యే అనసూయ' కారు ఎవరిది?

కాంగ్రెస్‌ ఎమ్మెల్యే స్టిక్కరింగ్‌, బీజేపీ కండువాతో తిరుగుతున్న కారు - పోలీసులకు ఫిర్యాదు చేసిన స్థానిక నాయకులు

The Car With The Congress MLA Sticker is Being Driven Suspiciously : ములుగు జిల్లా కేంద్రంలో గత కొద్ది రోజులుగా ములుగు నియోజకవర్గ ఎమ్మెల్యే అనసూయ స్టిక్కరింగ్​తో ఓ కారు అక్రమంగా తిరుగుతోంది. ఆ కారులో బీజేపీ కండువా ఉండటంతో పలు అనుమానాలు వ్యక్తమవుతున్నాయి. కాగా ఆ కారు కరీంనగర్​ జిల్లా చింతకుంట గ్రామానికి చెందిన వ్యక్తిదిగా గుర్తించారు. విషయం తెలుసుకున్న కాంగ్రెస్ శ్రేణులు మంత్రి దృష్టికి తీసుకెళ్లగా, సీతక్క సూచన మేరకు కాంగ్రెస్​ బీసీ సెల్​ జిల్లా అధ్యక్షుడు వంగ రవి యాదవ్​తో పాటు నాయకులు సోమవారం ములుగు పోలీస్ స్టేషన్​లో ఎస్సై వెంకటేశ్వరావుకు ఫిర్యాదు చేశారు.

వెంటనే కారు యజమానిపై చట్ట ప్రకారం చర్యలు తీసుకోవాలని కోరారు. త్వరలోనే సంబంధిత వ్యక్తిని పట్టుకుని, విచారణ చేపట్టి చర్యలు తీసుకుంటామని ఈ సందర్భంగా ఎస్సై వెంకటేశ్వ రావు తెలిపారు. ఫిర్యాదు చేసిన వారిలో కాంగ్రెస్ ములుగు పట్టణ అధ్యక్షుడు చింతనిప్పుల బిక్షపతి, విద్యార్థి సంఘం నాయకులు మామిడిశెట్టి కోటి, ఐలయ్య, రమేష్​, అభినవ్ తదితరులు ఉన్నారు. ఇదిలా ఉండగా కాంగ్రెస్ ఎమ్మెల్యే స్టిక్కరింగ్ కలిగిన కారులో బీజేపీ కండువా కనిపించడం జిల్లాలో చర్చనియాంశంగా మారింది.