ఉప్పల్​లో బస్సు ఢీకొని యువతి మృతి

ఇంజినీరింగ్​ చివరి సంవత్సరం... ప్రాజెక్టు పనులు చాలా ఉంటాయి. వాటి కోసం ద్విచక్ర వాహనంపై అమీర్​పేటకు వెళ్తున్నారు ఇద్దరు అమ్మాయిలు. కానీ.. వారిద్దరిలో ఒక యువతి మృత్యువు అంత వేగంగా ఆర్టీసీ బస్సు రూపంలో వస్తుందని ఊహించలేకపోయింది.

హైదరాబాద్​ ఉప్పల్​లో జరిగిన రోడ్డు ప్రమాదంలో ఇంజినీరింగ్ విద్యార్థిని మృతిచెందారు. బోడుప్పల్​కు చెందిన స్నేహ... బోగారంలోని హోలీ మేరీ కళాశాలలో ఇంజినీరింగ్ నాలుగో సంవత్సరం చదువుతున్నారు. కాలేజ్ నుంచి ద్విచక్ర వాహనంపై ప్రాజెక్టు పని మీద అమీర్​పేటకు తన స్నేహితురాలితో కలిసి బయలుదేరారు.

రక్తపు మడుగులో విగతజీవిగా...
ఉప్పల్​ లోని గాంధీ విగ్రహం సమీపంలోవెనక నుంచి వేగంగా వచ్చిన ఆర్టీసీ బస్సు ఢీకొట్టింది. తలకు తీవ్ర గాయాలై విద్యార్థిని అక్కడికక్కడే మృతి చెందింది. మరో అమ్మాయి స్వల్పంగా గాయపడటంతో ఆసుపత్రికి తరలించారు. కేసు నమోదు చేసుకున్న పోలీసులు దర్యాప్తు చేస్తున్నారు.

ఇవీ చూడండి:నీళ్లే వారిని మృత్యు ఒడికి చేర్చాయి