ఆన్లైన్ బెట్టింగ్ ద్వారా కోట్ల రూపాయల మోసాలకు పాల్పడుతున్న ముఠాపై ఈడీ దృష్టి సారించింది. చైనా వ్యక్తితో పాటు మరో ముగ్గురిపై మనీ లాండరింగ్ కింద ఎన్ఫోర్సమెంట్ డైరెక్టరేట్ కేసు నమోదు చేసింది. చైనాకు చెందిన కంపెనీలు ఢిల్లీలో ఈ కామర్స్ పేరుతో రెండేళ్ల క్రితం వ్యాపారం ప్రారంభించి ఆన్లైన్ గేమ్స్ నిర్వహిస్తున్నట్లు హైదరాబాద్ సీసీఎస్ పోలీసుల దర్యాప్తులో తేలింది. 7 నెలల వ్యవధిలో 1100 కోట్ల రూపాయలను పలు బ్యాంక్ ఖాతాల నుంచి చైనా కంపెనీలకు దారి మళ్లించినట్లు సీసీఎస్ పోలీసులు గుర్తించారు.
దీంతో సీసీఎస్ పోలీసులు ఈడీకి, ఆదాయపన్ను అధికారులకు లేఖ రాశారు. ఈడీ అధికారులు మనీ లాండరింగ్ కింద కేసు నమోదు చేసి దర్యాప్తు చేపట్టారు. ఇప్పటికే ఈ కేసులో సీసీఎస్ పోలీసులు చైనా వ్యాపారి యాహూవో, దిల్లీకి చెందిన వ్యక్తులు అంకిత్, ధీరజ్, నీరజ్లను అరెస్ట్ చేసి రిమాండ్కు తరలించారు. పరారీలో ఉన్న మిగతా వ్యక్తుల కోసం గాలిస్తున్నారు.
ఇవీ చూడండి: రూ.81 కోట్ల విలువ చేసే మాదకద్రవ్యాలు పట్టివేత
