మన అభిరుచులకు తగ్గట్టుగా... ఎలా కావాలంటే అలా నాణ్యమైన కేకులను తయారు చేస్తూ అదరహో అనిపిస్తోంది జయ భార్గవి. అంతేనా... తను నేర్చుకున్న కేకుల తయారీని వందల మందికి నేర్పిస్తోంది. శిక్షణను కేవలం హైదరాబాద్కే పరిమితం చేయకుండా ఆన్లైన్ ద్వారా మహారాష్ట్ర, కర్ణాటక రాష్ట్రాలతో పాటు అమెరికాలో ఉన్న వారికి కూడా అందిస్తున్నారు.
ప్రకాశం జిల్లా దొర్నాల ప్రాంతానికి చెందిన క్రిష్ణ చైతన్య, జయభార్గవి దంపతులు నిజాంపేట్లో నివసిస్తున్నారు. ఏడాది క్రితం ఉద్యోగరిత్యా క్రిష్ణచైతన్య కుటుంబంతో సహా అమెరికా వెళ్లారు. ఆ సమయంలో ఇంట్లో ఒంటరిగా ఉన్న జయభార్గవి కేకులు తయారు చేయడం నేర్చుకున్నారు. ఆ తర్వాత కొన్నాళ్లకు హైదరాబాద్ తిరిగొచ్చేశారు. క్రిష్ణచైతన్య సాఫ్ట్వేర్ ఉద్యోగం చేస్తుంటే... జయ భార్గవి తిరిగి కేకుల తయారీ మెళకువలపై దృష్టిసారించారు. అందమైన కేకులను అధునాతనంగా తయారుచేయడంపై ఆమె పట్టుసాధించారు. నాణ్యమైన కేకులు తయారు చేస్తూ... యువతులకు కేకులు తయారీపై శిక్షణ కూడా ఇస్తున్నారు.
అమెరికా, పుణే, ముంబయి, బెంగళూరు, హైదరాబాద్లో యువతులకు కేకుల తయారీపై జయభార్గవి శిక్షణ ఇస్తున్నారు. అమెరికాలో ఉన్న బ్యాచ్కు మాత్రం ఆన్లైన్లో శిక్షణ ఇస్తున్నారు. ఆల్మండ్, రెడ్ వెల్, చీజ్, రిచ్ చీజ్, న్యూయార్క్ చీజ్, బట్టర్ స్కాచ్, పైన్ ఆపిల్, వెనిల్లా, షుగర్లెస్ కేకులు, పిల్లలకు బొమ్మల ఆకృతుల్లో, పుట్టిన రోజు, పెళ్లిరోజు, అన్నప్రాసన, దోతీ ఫంక్షన్లకు ప్రత్యేకంగా కేకులు తయారు చేస్తున్నారు. ఇప్పటి వరకు తాము కేజీ కేకు నుంచి 12 కేజీల బరువైన కేకులను తయారు చేశామని సంస్థ నిర్వాహకులు చెబుతున్నారు.
కేకులు కావాలనుకునే వారు ఫేస్బుక్, ఇన్స్టాగ్రాముల్లో ఉన్న జయయమ్మీ కేక్స్ పేజీ ద్వారా ఆన్లైన్లో ఆర్డర్ చేయొచ్చని చెబుతున్నారు. పది కిలోమీటర్ల పరిధిలో అయితే ఉచితంగా, అంతకంటే ఎక్కువ దూరం అయితే సేవా చార్జీలు వసూలు చేస్తామంటున్నారు. ఇప్పటి వరకు 300లకు పైగా కేకులను తయారు చేశామని సంస్థ నిర్వాహకులు పేర్కొన్నారు. ఎలాంటి సందేహాలు వచ్చినా విసుక్కోకుండా అందరికీ అర్థమయ్యేలా జయభార్గవి వివరించి చెప్తారని శిక్షణపొందే యువతులు చెబుతున్నారు.
జయభార్గవి ఇలాగే మరిన్ని రకాల కేకులు తయారు చేస్తూ... తనకు చేతనైనంత మందికి శిక్షణనిచ్చి వారికి బాసటగా నిలవాలని కోరుకుంటోంది.
ఇవీ చూడండి: మిట్టమధ్యాహ్నం మహిళ మెడలోంచి గొలుసు చోరీ
