కరోనా మహమ్మారి కారణంగా విద్య, వైద్యం, పని సంప్రదాయాలు అన్నీ మారిపోయాయి. వైరస్ విజృంభణతో చదువు ఆన్లైన్ అయిపోయింది. పని.. వర్క్ ఫ్రం హోంకు మారింది. సమావేశాలు, చర్చలు వర్చువల్గా జరుగుతున్నాయి. వినోదం సైతం ఓటీటీలు, యూట్యూబ్ ఛానళ్ల స్ట్రీమింగ్ అవుతోంది. వీటన్నింటి కారణంగా గతేడాది కాలంగా డేటా వాడకం(data demand) నాలుగింతలు పెరిగినట్లు ట్రాయ్(TRAI) తెలిపింది. డేటా వినియోగదారులతో పాటు.. రోజువారీ సగటు డేటా వినియోగం సైతం 14 జీబీ నుంచి 30 జీబీలు దాటుతున్నట్లు ట్రాయ్ పేర్కొంది. దీంతో కొవిడ్ మహమ్మారి కారణంగా నెట్టింట్లో ట్రాఫిక్ అమాంతం పెరిగినట్లు తెలుస్తోంది. పెరుగుతున్న డేటా వినియోగానికి అనుగుణంగా కంపెనీలు సైతం ఇంటర్నెట్ వేగాన్ని పెంచుకుంటూ వెళ్తున్నాయి.
పోటాపోటీగా
ఈ డిమాండ్తో మార్కెట్లో మెజారిటీ వాటా చేజిక్కించుకునేందుకు టెలికాం సంస్థలు పోటీపడుతున్నాయి. ఏడాది కాలంలో ఎయిర్టెల్ ఎక్స్ట్రీమ్ వినియోగదారుల సంఖ్య 27 శాతం పెరిగిందంటే డిమాండ్ ఎలా ఉందో మనం అర్థం చేసుకోవచ్చు. దీంతో 2021 సంవత్సరానికి గాను ఆ కంపెనీ 30 లక్షల కస్టమర్ మార్కును చేరుకుంది. గతేడాది విధించిన లాక్డౌన్ సమయంలోనే కొత్తగా 20 లక్షల మంది జియో ఫైబర్ వినియోగదారులు చేరారని.. బోర్డు ఏజీఎం మీట్లో కంపెనీ ఛైర్మన్ ముఖేష్ అంబానీ ప్రకటించారు. డేటా వినియోగం సైతం గతేడాదితో పోలిస్తే.. 3.5 రెట్లు పెరిగినట్లు ఆయన పేర్కొన్నారు. వీటితో పాటు, యాక్ట్ ఫైబర్ నెట్, ఎక్సైటెల్ వంటి సంస్థలు వాటి మార్కెట్ వాటాను మరింత పెంచుకున్నాయి. గతేడాది కాలంలో తమ కంపెనీకి 65 శాతం కొత్త కనెక్షన్లు వచ్చినట్లు ఎక్సైటెల్ కంపెనీ ప్రకటించింది. అయితే బ్రాడ్బ్యాండ్ కనెక్షన్లలో ఈ వృద్ధి అభివృద్ధి చెందిన పాశ్చాత్య దేశాలతో చాలా తక్కువే అయినా.. ఆ దిశగా మన దేశం వడివడిగా అడుగులేస్తోంది. జపాన్లో ఇది 50 శాతంగా, చైనాలో 14 శాతంగా, అమెరికాలో 30 శాతం ప్రజలు డేటా వినియోగంలో ఉన్నారు.
రాజధానిలోనే వినియోగం ఎక్కువ
పెరుగుతున్న డేటా డిమాండ్, వినియోగదారుల సంఖ్యతో బ్రాడ్బ్యాండ్ల కనెక్షన్ల సంఖ్య సైతం నాలుగింతలకు ఎగబాకింది. రాష్ట్రంలో కొవిడ్కు ముందు కొత్త బ్రాడ్బ్యాండ్ కనెక్షన్ల వృద్ధి ఏటా 0.5 శాతం ఉంటే.. గత రెండేళ్లలో అది 2.2 శాతానికి పెరిగింది. ఒక్క హైదరాబాద్ నగరంలోనే 2019 ఏప్రిల్ నుంచి 2020 మార్చి వరకు 20 టీబీల డేటా వినియోగిస్తే, 2020 ఏప్రిల్ నుంచి 2021 జూన్ వరకు 50 టీబీలకు చేరినట్లు టెలికాం సంస్థలు వెల్లడించాయి. ప్రస్తుతం దేశవ్యాప్తంగా 2.28 కోట్ల బ్రాండ్బ్యాండ్ కనెక్షన్లుండగా.. వర్క్ ఫ్రం హోం, హైబ్రిడ్ వర్క్ మోడళ్లతో ఈ సంఖ్య మరింత పెరిగే అవకాశాలున్నట్లు నిపుణులు చెబుతున్నారు.
ఆన్లైన్ విద్యతోనే ఎక్కువ వాడకం
చదువులు, ఆఫీస్ కార్యకలాపాలతో పాటు.. షాపింగ్, ఫుడ్ ఆర్డర్లు, లావాదేవీలు ఇలా ప్రతిదీ ఆన్లైన్మయమైంది. మరోవైపు యాప్ల వినియోగం రోజురోజుకూ పెరిగిపోతోంది. వినోదాన్ని పంచే థియేటర్లు సైతం మూతపడటంతో.. నెట్ ఫ్లిక్స్, ప్రైమ్ వీడియో, ఆహా తదితర యాప్ల ద్వారానే వినోదాన్ని స్ట్రీమింగ్ చేస్తున్నారు. ఇత్యాది కారణాలతో డేటా వినియోగానికి ఎన్నడూ లేనంతగా డిమాండ్ పెరిగిందని నిపుణులు అంటున్నారు. ఆన్లైన్ డేటా వినియోగం పెరిగేందుకు వర్క్ ఫ్రం హోం కన్నా.. ఆన్లైన్ బోధనే కారణమని నిపుణులు అంటున్నారు. ప్రత్యక్ష బోధనలకు స్వస్తి పలికిన విద్యాసంస్థలు గతేడాదిగా ఆన్లైన్లోనే బోధిస్తున్నాయి. దీంతో అనివార్యంగా ప్రతి విద్యార్థి చేతిలో స్మార్ట్ఫోన్, ల్యాప్టాప్, సిస్టమ్, ట్యాబ్ ఇలా ఏదో ఒక గ్యాడ్జెట్ వాడకంతో ఈ ప్రభావం ఇంటర్నెట్ వినియోగంపై పడిందని వారంటున్నారు. దీంతో గతంలో ఒకటి, రెండు గ్యాడ్జెట్లు వాడే కుటుంబాలు.. వినియోగదారుల సంఖ్య పెరగటంతో క్రమంగా వైఫై కనెక్షన్ల వైపు మళ్లుతున్నాయి.
ఇదీ చదవండి: 108 STAFF: ఆగి పోయిన పసి గుండెను.. మళ్లీ బతికించారు
