Cyber Fraud: వ్యాపారంలో వచ్చిన లాభాలు దాచుకుంటే ఏం లాభం.. మా సంస్థకు ఇస్తే కొన్ని రోజుల్లోనే రెట్టింపు చేస్తాం. ఇప్పటికే ఎంతో మంది మా వల్ల రెండు చేతులా డబ్బు సంపాదిస్తున్నారు. ఇలా వాట్సప్‌, ఫోన్‌ ద్వారా సైబర్ కేటుగాళ్లు వల విసురుతున్నారు. ఇప్పటి వరకు ఆన్‌లైన్‌లో మోసాలు జరిగేవి. తాజాగా తెలుగు రాష్ట్రాల్లో నకిలీ కంపెనీలు తెరిచిన మాయగాళ్లు.. దళారులను ఏర్పాటు చేసుకొని కొత్త తరహా దందా ప్రారంభించారు. నగరంలో మకాం వేసిన కేటుగాళ్లు.. తాము ఎవరనేది బయటకు రానీయకుండా గుట్టుగా కార్యకలాపాలు సాగిస్తున్నారు. కొద్దిరోజుల వ్యవధిలోనే 10 మందికి పైగా బాధితులు రూ.5 కోట్ల మేర నష్టపోయినట్టు పోలీసులకు ఫిర్యాదులు అందాయి.
రూ.2 లక్షలిస్తే.. రెండు రోజుల్లో రూ.3.5 లక్షలు: మోసగాళ్లు క్రిప్టో కరెన్సీ.. బంగారం, అంతర్జాతీయంగా క్రిప్టో, జాతీయంగా బంగారం ధర పెరుగుదలతో లాభాలే లాభాలంటూ జనాన్ని ఊరిస్తున్నారు. రూ.2 లక్షలిస్తే రెండు రోజులకే రూ.3.5 లక్షలు అని, మీకు తెలిసిన వారిని సభ్యులుగా చేర్పిస్తే దానికి సంబంధించి కమీషన్ కూడా వస్తుందని చెబుతున్నారు. వృత్తి నిపుణులు, వ్యాపారులు, సంపన్న వర్గాలను లక్ష్యంగా చేసుకొని దళారులు చెబుతున్న మాటలివి. అయితే ఇవన్నీ నిజమేనని భావించిన ఎంతో మంది వాళ్ల కష్టార్జితాన్ని క్షణాల్లోనే నష్టపోతున్నారు.
కొద్దిరోజులుగా బేగంబజార్, సనత్నగర్, అమీర్పేట్, అబిడ్స్ ప్రాంతాల్లో మకాం వేసిన మోసగాళ్లు.. 1 నుంచి 2 శాతం వరకు కమీషన్ ఇస్తామంటూ దళారులను ఏర్పాటు చేసుకున్నారు. పోగొట్టుకున్న డబ్బులకు సరైన ఆధారాలు చూపలేక కొందరు మౌనంగా ఉండిపోతున్నారు. మరి కొందరు పోలీసు ఉన్నతాధికారులకు ఫిర్యాదు చేసినట్టు తెలుస్తోంది.
ఎలా జరుగుతోందంటే?: హైదరాబాద్కి చెందిన బంగారు ఆభరణాల దుకాణ యజమానితో ఆర్థిక లావాదేవీలు నిర్వహించే ఓ వ్యక్తి బంపర్ ఆఫర్ ఇస్తానంటూ ఆశ చూపించాడు. నగల వ్యాపారి వద్ద ఉన్న రూ.2 కోట్లు ఇస్తే రెండు రోజుల్లో వాటికి రూ.40 లక్షలు లాభం ఇస్తానని నమ్మించాడు. దానిలో తనకు రూ.10 లక్షలు కమీషన్ ఇవ్వాలంటూ షరతును కూడా విధించాడు. దళారీ మాటలు నమ్మిన వ్యాపారి తాను అడిగినంత నగదును చేతికిచ్చాడు. గడువు ముగిసినా నగదుకు సంబంధించి అసలు, లాభం ఇవ్వకపోవడంతో మధ్యవర్తిని వ్యాపారి నిలదీశాడు.
తనకు కేవలం రూ.25 వేల కమీషన్ మాత్రమే ఇచ్చారని, రూ.2 కోట్లు తీసుకున్న వ్యక్తి వివరాలు తనకు తెలియదని మధ్యవర్తి చేతులెత్తేశాడు. ఈ మేరకు విశాఖ పట్టణానికి చెందిన వైద్యుడు రూ.2.5 కోట్లు, సనత్నగర్కు చెందిన వ్యాపారి రూ.50 లక్షలు, జూబ్లీహిల్స్కు చెందిన ప్రైవేటు ఉద్యోగి రూ.10 లక్షల మేర క్రిప్టో కరెన్సీ పేరుతో మోసపోయినట్లుగా తెలుస్తోంది. బాధితుల ఫిర్యాదుతో నగర పోలీసులు కేసు నమేదు చేసి కొందరిని అదుపులోకి తీసుకున్నట్లు సమాచారం. అయితే ప్రధాన నిందితుల కోసం వెతుకుతున్నారు. వారి ఆచూకీ దొరికితే మోసాల వెనుక ఉన్న అసలు గుట్టు బయటపడుతుందని భావిస్తున్నారు.
ఇవీ చదవండి:
