మ్యాట్రిమోనీ నుంచి ప్రవాస భారతీయునికి ప్రేమతో దగ్గరైంది. నా దగ్గర చాలా ఆస్తి ఉంది.. కానీ అవి రావాలంటే పెళ్లికావాలంది. ఆస్తులకు సంబంధించి చట్టపరమైన సమస్యలు తొలగించుకునేందుకు డబ్బులు కావాలంది. నమ్మిన ఆ వ్యక్తికి నష్టమే మిగిలింది. జూబ్లీహిల్స్ పోలీసులకు ఫిర్యాదు చేయగా.. వారు ఆమెను.. ఇందుకు సహకరించిన కొడుకును అదుపులోకి తీసుకున్నారు. నిందితురాలి భర్త పరారీలో ఉన్నాడు.
ఏం చేశారంటే...
విలాసానికి అలవాటుపడిన ఓ కుటుంబం... ప్రవాసభారతీయుడిని మోసం చేసి రూ. లక్షల్లో డబ్బులు దోచుకున్నారు. హైదరాబాద్ జూబ్లీహిల్స్కు చెందిన మాళవిక ఓ మ్యాట్రిమోనీలో నకిలీ అకౌంట్ను తెరిచింది. తన పేరు కీర్తి అని వైద్యురాలిగా నమోదు చేసుకుంది. ఇందుకు భర్త, కుమారుడు తమ వంతు సహాయమందించారు. క్యాలిఫోర్నియాకు చెందిన వరుణ్ అనే సాఫ్ట్వేర్ ఇంజనీర్ ఆమె ప్రొఫైల్ చూసి చాటింగ్ ప్రారంభించాడు.
నమ్మించేందుకు కథలు..
అతన్ని నమ్మించేందుకు మాళవిక కథ అల్లింది. తనకు రూ. కోట్ల ఆస్తులున్నాయని.. తన తల్లి వేధింపుల వల్ల బయటకు వచ్చి స్వతంత్రంగా బతుకుతున్నానని నమ్మబలికింది. వివాహమైతే ఆస్తులన్నీ తన పేరిట మారుతాయని చెప్పింది. ఆస్తులకు సంబంధించిన చట్టపరమైన సమస్యలు పరిష్కరించుకునేందుకు రూ. 65 లక్షలు కావాలని కోరింది. దీనికి వరుణ్ ఆమె ఖాతాలోకి డబ్బు పంపించాడు.
మోసపోయానని తెలుసుకుని...
ఇంకేముంది... ఒక్కసారి డబ్బులొచ్చాక మరి కనిపించలేదు మాళవిక. మోసపోయానని గుర్తించిన వరుణ్ జూబ్లీహిల్స్ పోలీసులకు ఫిర్యాదు చేశారు. నిందితులైన మాళవిక దంపతులపై బోయిన్పల్లి, నల్లకుంట సైబర్ క్రైం పోలీస్స్టేషన్లలో కేసులు నమోదైనట్లు పోలీసులు తెలిపారు. ఆ వివరాలతో మాళవికను, కొడుకు ప్రణవ్ను పట్టుకున్నామని... భర్త పరారీలో ఉన్నాడని పోలీసులు వెల్లడించారు.
