సికింద్రాబాద్‌లోని గాంధీ ఆస్పత్రిని ప్రభుత్వ ప్రధాన కార్యదర్శి సోమేశ్‌కుమార్, సీపీ అంజనీకుమార్ సందర్శించారు. గాంధీలో బెడ్లు, ఆక్సిజన్ లభ్యతకు సంబంధించిన వివరాలను అడిగి తెలుసుకున్నారు. ప్రభుత్వ ఆసుపత్రుల్లో కొవిడ్ చికిత్సలకు సంబంధించి సీఎస్ క్షేత్రస్థాయి పరిశీలనలు చేస్తున్నారు.
పలు వార్డుల్లో తిరిగి కొవిడ్ బాధితుల యోగక్షేమాలు అడిగి తెలుసుకున్నారు. గాంధీ ఆస్పత్రిలోని ఎమర్జెన్సీ విభాగం వద్ద ఏర్పాటు చేసిన నూతన పడకలను పరిశీలించారు. ఆస్పత్రిలో చికిత్స పొందుతున్న రోగులకు మందులు, ఆక్సిజను కొరత రాకుండా చూడాలని వైద్యులు సూచించారు. నూతనంగా ఏర్పాటు చేసిన హెల్ప్డెస్క్ను పరిశీలించారు. కొవిడ్ బాధితులకు మెరుగైన చికిత్స అందించాలని పేర్కొన్నారు. గాంధీ ఆస్పత్రి వద్ద పోలీసులు పటిష్ఠ భద్రత కల్పించాలని పోలీస్ కమిషనర్ను సీఎస్ కోరారు.
నిన్న జీహెచ్ఎంసీ పరిధిలో ఆకస్మికంగా తనిఖీ చేసి ర్యాపిడ్ ఫీవర్ సర్వే వివరాలు సీఎస్ అడిగి తెలుసుకున్నారు. బొగ్గులకుంట అర్బన్ హెల్త్ సెంటర్‌ను సందర్శించి కొవిడ్ కౌన్సెలింగ్ కేంద్రాన్ని పరిశీలించారు. అనంతరం ముఖ్యమంత్రితో జరిగిన సమీక్షలో రాష్ట్రంలో కొవిడ్ పరిస్థితులను వివరించారు. సీఎం ఆదేశాల మేరకు కరోనా కట్టడి చర్యలు, చికిత్సకు సంబంధించిన అంశాలపై సోమేశ్ నేరుగా దృష్టిసారించారు.
ఇదీ చూడండి: పడకలు కావాలన్నా, మృతదేహాలు తరలించాలన్నా రూ.వేలల్లో వసూలు
