రక్తదానం ప్రాణదానంతో సమానం: అంజనీకుమార్

రక్తదానం ప్రాణదానంతో సమానమని సీపీ అంజనీకుమార్​ పేర్కొన్నారు. ప్రమాదాలు జరిగినప్పుడు సకాలంలో రక్తం అందక ఎంతో మంది తమ విలువైన ప్రాణాలను కోల్పోతున్నారని తెలిపారు. ప్రతి ఒక్కరూ రక్తదానం చేయాలని కోరారు.

సకాలంలో రక్తం అందక చాలా మంది మృతి చెందుతున్నారని.. రక్తదానం ప్రాణదానంతో సమానమని హైదరాబాద్ పోలీస్​ కమిషనర్​ అంజనీకుమార్ పేర్కొన్నారు. పేట్లబురుజులోని ఆర్మ్​డ్ రిజర్వు ప్రధాన కార్యాలయ ప్రాంగణంలో రక్తదాన శిబిరాన్ని సీపీ ప్రారంభించారు. హైదరాబాద్ సిటీ సెక్యూరిటీ కౌన్సిల్ ఆధ్వర్యంలో ఏర్పాటు చేసిన ఈ శిబిరంలో 100 మందికి పైగా పోలీసులు రక్తదానం చేశారు.

రక్తదానం చేస్తున్న పోలీసులు

తలసేమియా వ్యాధిగ్రస్తులకు తరచూ రక్తం అందించాల్సి ఉంటుందని.. ఇందుకోసం హైదరాబాద్ కమిషనరేట్ తరఫున రక్తదానం చేసి బాధితులకు అందిస్తున్నామని అంజనీకుమార్ పేర్కొన్నారు. అవగాహనతోనే తలసేమియా వ్యాధి నివారణ సాధ్యమని తెలిపారు.