గ్రేట‌ర్ హైద‌రాబాద్లో కరోనా కేసులు తీవ్ర ఆందోళనకు గురిచేస్తున్నాయి. రోజురోజుకూ.. వంద‌ల సంఖ్య‌లో కేసులు నమోదవుతున్నాయి. కరోనా ప‌రీక్ష‌ల సంఖ్య పెంచ‌డం.. ప్రజలు ఎలాంటి నిబంధ‌న‌లు పాటించ‌కుండా తిర‌గ‌డం వైరస్ ఉద్ధృతికి కార‌ణంగా భావిస్తున్నారు.
వైద్యుడు మృతి..
రాష్ట్రంలో కరోనా మహమ్మారి బారిన పడి తొలి డాక్టర్ మృతిచెందిన‌ట్లు అధికారులు వెల్లడించారు. వారం రోజుల కిందట జ్వరంతో కిమ్స్ ఆసుపత్రిలో న‌గ‌రానికి చెందిన ఓ వైద్యుడు వచ్చారు. అనుమానంతో కరోనా టెస్టులు నిర్వహించగా పాజిటివ్ అని తెలింది. ఇవాళ చికిత్స పొందుతూ... ప్రాణాలు కోల్పోయిన‌ట్లు అధికారులు తెలిపారు.
రాజాసింగ్కు నెగిటివ్..
కరోనా పరీక్షలో గోషామ‌హాల్ ఎమ్మెల్యే రాజాసింగ్కు నెగిటివ్ వ‌చ్చింది. తన గన్మెన్కు పాజిటివ్ నిర్ధరణ కాగా... ఎమ్మెల్యే పరీక్ష చేయించుకున్నారు. చర్లపల్లి డివిజన్లో పనిచేస్తున్న ఐదుగురు పారిశుద్ధ్య కార్మికులకు కరోనా సోకింది. యూసుఫ్గూడ సర్కిల్-19 పరిధిలో 22 మంది వైరస్ బారిన పడినట్లు అధికారులు వెల్లడించారు. అందులో ఒక్క మధురానగర్ కాలనీలోనే ఐదుగురికి వైరస్ సోకిందని పేర్కొన్నారు. అమీర్పేట్ కార్పొరేటర్ శేషు కుమారికి కరోనా నిర్ధరణ అయింది. ఆమె కుటుంబ సభ్యుల్లో మరో 6 గురికి మహమ్మారి సోకింది.
కుత్బుల్లాపూర్ పరిధిలో 19 మందికి..
సోమవారం కుత్బుల్లాపూర్ పరిధిలో 19 కరోనా పాజిటివ్ కేసులు నమోదయ్యాయి. జీహెచ్ఎంసీ కాప్రా సర్కిల్ కార్యాలయంలో కరోనా కలకలం సృష్టించింది. కార్యాలయంలోని 13 మంది సిబ్బందికి మహమ్మారి సోకింది. ఇంజినీరింగ్ విభాగంలో డీఏఓకు కరోనా నిర్ధరణ అయింది. మున్సిపల్ ఆఫీస్ను సిబ్బందిని శానిటైజ్ చేశారు.
మలక్పేట ఏరియా ఆసుపత్రిలో..
నిజాంపేట్ నగర పాలక సంస్థ కార్యాలయంలో విధులు నిర్వహిస్తున్న ఒక‌రికి కరోనా పాజిటివ్ వ‌చ్చింది. నగరపాలక సంస్థలో అత్యవసర సేవ‌లు మినహా... ప్ర‌జ‌లెవరూ... కార్యాలయానికి రావొద్ద‌ని అధికారులు తెలిపారు. మలక్పేట ప్రభుత్వ ఏరియా ఆసుపత్రిలో 9 మంది సిబ్బందికి కరోనా పాజిటివ్ వ‌చ్చిన‌ట్లు అధికారులు వెల్లడించారు. రెండు రోజుల పాటు ఆపరేషన్ థియేటర్, లేబర్ రూం మూసివేసిన‌ట్లు పేర్కొన్నారు. కూకట్‌పల్లి, మూసాపేట సర్కిల్లో నివాసం ఉండే అన్న‌ద‌మ్ముల‌కు కరోనా పాజిటివ్ నిర్ధరణ అయింది.
ఇవీ చూడండి: నర్సాపూర్ నుంచి ఆరో విడత హరితహారం కార్యక్రమం: సీఎం
