గ్రేటర్‌ హైదరాబాద్‌ పరిధిలో కరోనా ఉద్ధృతం

గ్రేట‌ర్ హైద‌రాబాద్ పరిధిలో క‌రోనా తీవ్రమవుతోంది. ఇప్పటికే రోజుకు వెయ్యికి పైగా కేసులు నమోదవుతుండగా సోమవారం రాష్ట్ర హోంమంత్రి మహమూద్‌ అలీ కరోనా బారిన పడి... కుటుంబసభ్యులతో పాటు ఓ ప్రైవేట్‌ ఆస్పత్రిలో చికిత్స పొందుతున్నారు. పరిస్థితి నానాటికి విషమిస్తుండటం వల్ల సోమవారం కేంద్ర బృందం న‌గ‌రంలో విస్త్రృతంగా ప‌ర్యటించింది. కంటైన్ మెంట్ జోన్ల‌తో పాటు.. ఆస్పత్రులను సంద‌ర్శించింది. పరిస్థితి అదుపులోనే ఉందని, ప్రజలు భయపడాల్సిన పనిలేదని, జాగ్రత్తగా ఉండాలని రాష్ట్ర వైద్య, ఆరోగ్య శాఖ మంత్రి ఈటల రాజేందర్‌ చెప్పారు.

జంటన‌గ‌రాల్లో క‌రోనా కలకలం కొనసాగుతోంది. రాష్ట్రంలో నమోదవుతోన్న మొత్తం కేసుల్లో 90 శాతం ఇక్కడే వస్తున్నందున ప్రభుత్వ యంత్రాంగం కట్టడి చర్యల్లో నిమగ్నమైంది. ఇప్పటివరకు 14, 419 కేసులు న‌మోదుకాగా.. జీహెచ్ఎంసీ ప‌రిధిలోనే 10,666 కేసులు లెక్క తేలాయి. సోమవారం రాజధానిలో భారీగానే కొత్తకేసులొచ్చాయి.

హోం మంత్రి మ‌హ‌మూద్ అలీ, ఆయ‌న మ‌న‌ుమడికి క‌రోనా సోకింది. అర్ధరాత్రి వారిద్దరిని జూబ్లీహిల్స్‌లోని ఓ ప్రైవేటు ఆసుపత్రికి తరలించారు. మంత్రి పెషీ, ఇంటిని జీహెచ్ఎంసీ సిబ్బంది శానిటైజ్ చేశారు. పెషీలోని మిగ‌తా కార్యాల‌య సిబ్బందికి క‌రోనా ప‌రీక్షలు నిర్వహించారు. కూకట్​ప‌ల్లిలోని రామ్ దేవ్ రావు హాస్పిటల్‌లో పనిచేస్తున్న 17 మంది నర్సులు, ఆయాలకు కరోనా వ‌చ్చిన‌ట్లు అధికారులు ప్రక‌టించారు. యూసుఫ్ గూడ సర్కిల్ పరిధిలో సోమవారం 26 మందికి కరోనా పాజిటివ్‌గా నిర్ధదరణ అయింది.

అంబర్ పేట్‌ నియోజక వర్గ పరిధిలో జూన్‌ 29న... 65 కరోనా పాజిటివ్ కేసులు నమోదయ్యాయి. కొత్త నల్లకుంట పరిధిలో కరోనా బారిన పడి గాంధీ ఆస్పత్రిలో చికిత్స పొందుతూ ఒకరు మృతి చెందారు. సోమవారం నమోదైన కరోనా పాజిటివ్ కేసుల్లో అధికంగా అంబర్‌పేట్‌ డివిజన్‌లో 34, కాచిగూడ డివిజన్ పరిధిలో 14, గోల్నాక డివిజన్ పరిధిలో 3, నల్లకుంట 13, బాగ్ అంబర్‌పేట్ పరిధిలో ఒక కేసు నమోదయ్యాయి.

అంబర్‌ పేట్ పోలీస్ స్టేషన్లో ముగ్గురు కానిస్టేబుల్స్, హెడ్ క్వార్టర్స్ స్పెషల్ బ్రాంచ్ పోలీస్ కానిస్టేబుల్ ఒకరికి పాజిటివ్ నిర్ధరణ అయింది. నల్లకుంట పరిధిలో ఒకే కుటుంబంలో ఇద్దరు చిన్నారులకు వైరస్​ సోకింది. హైదరాబాద్ కమిషనరేట్ పరిధిలో కరోనా నుంచి కోలుకున్న తూర్పు, దక్షిణ మండల పరిధిలోని 16 మంది పోలీసులు సోమవారం నుంచి తిరిగి విధుల‌కు హాజ‌ర‌య్యారు. 4 రోజుల నుంచి పోలీస్ శాఖలో కరోనా బాధితులు క్రమంగా కోలుకుని విధుల్లో చేరడం హర్షణీయమని క‌మిష‌న‌ర్ అంజ‌నీ కుమార్ చెప్పారు.

రాష్ట్రంలో కరోనా కేసులు భారీగా పెరుగుతున్నందున కేంద్ర బృందం మరో మారు రాష్ట్రంలో పర్యటించింది. గచ్చిబౌలి లోని టిమ్స్ ఆస్పత్రిని సందర్శించి అక్కడి సదుపాయాలను పరిశీలించింది. కేంద్ర ఆరోగ్య శాఖ జాయింట్ సెక్రటరీ లవ్ అగర్వాల్ నేతృత్వంలోని బృందం... టిమ్స్‌లో ఐసీయూ పడకలు, ఐసోలేషన్ బెడ్స్ వివరాలపై ఆరా తీసింది. అనంతరం గాంధీ ఆస్పత్రిలోని వైరాలాజి లాబ్‌ను సందర్శించిన లవ్ అగర్వాల్ బృందం.. అక్కడి నుంచి దోబి గల్లీలోని కంటైన్మెంట్ జోన్‌లను పరిశీలించింది. అనంతరం బీఆర్‌కే భవన్‌లో మంత్రి ఈటల, వైద్య ఆరోగ్య శాఖ అధికారులతో భేటీ అయ్యి.. రాష్ట్రంలోని పరిస్థితులపై చర్చించింది.

ఇవీ చూడండి: హోంమంత్రి మహమూద్​ అలీకి కరోనా పాజిటివ్