విపక్షాలకు చెందిన ఎమ్మెల్యేలను తమవైపు ఎలా తిప్పుకోవాలనే కుట్రను మోదీని చూసి కేసీఆర్ నేర్చుకున్నారని హైదరాబాద్లో నిర్వహించిన ఓ సమావేశంలో పీసీసీ ప్రచార కమిటీ ఛైర్‌ పర్సన్‌ విజయశాంతి ధ్వజమెత్తారు. పశ్చిమ బంగాలోని టీఎంసీ పార్టీకి చెందిన 40 మంది ఎమ్మెల్యేలు తనను సంప్రదించారని, లోక్సభ ఫలితాలు వచ్చిన వెంటనే మమత ప్రభుత్వం పడిపోతుందని మోదీ హెచ్చరించడం ప్రజాస్వామ్యానికి దుర్దినమని దుయ్యబట్టారు.
ఈ దుస్సాంప్రదాయానికి అడ్డుకట్ట వేసే ఉద్దేశంతోనే తమ మేనిఫెస్టోలో పార్టీ ఫిరాయింపు చట్టాన్ని సంస్కరించనున్నట్లు పొందుపరిచామని విజయశాంతి తెలిపారు. కాంగ్రెస్ అధినేత రాహూల్ గాంధీ తీసుకున్న ఈ నిర్ణయాన్ని భాజపాయేతర పార్టీలన్ని మద్దతిచ్చి, ప్రజాస్వామ్యాన్ని కాపాడాలని కోరారు. సీబీఐ, ఐటీ దాడుల పేరుతో ప్రతిపక్షాలకు చెందిన నేతలను భయాందోళనకు గురిచేస్తున్నారని ఆమె ఆందోళన వ్యక్తం చేశారు. ఈ పరిణామాలకు చరమగీతం పాడేందుకు రాహుల్ నేతృత్వంలో కాంగ్రెస్ ప్రభుత్వం ఏర్పడాలని ఆకాంక్షించారు.
ఇవీ చూడండి : ఖైరతాబాద్ మహాగణపతి విగ్రహ ఏర్పాటుకు తొలిపూజ
