CM KCR Review On Paddy: అకాల వర్షాలతో చేతికొచ్చిన వరి తడిసిపోతున్న తరుణంలో.. రైతులు ఎలాంటి ఆందోళన చెందవద్దని తడిసిన ధాన్యాన్ని పూర్తిగా సేకరిస్తామని ముఖ్యమంత్రి కేసీఆర్ భరోసా ఇచ్చారు. మామూలు ధాన్యానికి చెల్లించినధరనే తడిసిన ధాన్యానికి చెల్లిస్తామని హామీ ఇచ్చారు. యాసంగి వరి కొనుగోళ్లు జరుగుతున్న తీరు, అకాల వర్షాలకి తడిసినధాన్యం సేకరణ.. భవిష్యత్తులో యాసంగిసాగు, వ్యవసాయశాఖ అనుసరించాల్సిన కార్యాచరణ తదితర అంశాలపై.. ముఖ్యమంత్రి కేసీఆర్ ఉన్నతస్థాయి సమీక్ష నిర్వహించారు.
అకాల వర్షాలకు వరిధాన్యం తడుస్తున్నందున రైతన్నల ఆవేదనను ప్రభుత్వం అర్థం చేసుకుంటుందని సీఎం కేసీఆర్ పేర్కొన్నారు. ఆపత్కాలంలో వారి కష్టాన్ని పంచుకొనేందుకు సిద్ధమని ఆయన తెలిపారు. తడిసిన వరి ధాన్యాన్ని సేకరించాలని నిర్ణయించినట్లు తెలిపిన ఆయన.. వీలైనంత త్వరగా ఒక్క గింజ మిగలకుండా సేకరిస్తామని హామీ ఇచ్చారు. ఈ విషయంపై అన్నదాతలు ఆందోళన చెందవద్దని సీఎం కేసీఆర్ స్పష్టం చేశారు. మరో మూడు, నాలుగురోజులు వర్షాలు కురిసే అవకాశంఉందని చెప్పి.. అప్పటివరకు పంట కోయకుండా సంయమనం పాటిస్తే.. ధాన్యం తడవకుండా ఉంటుందని కర్షకులకు సలహా ఇచ్చారు.
శాస్త్రీయ అధ్యయనం చేయాలి: ప్రస్తుత వర్షాలను గుణపాఠంగా తీసుకొని భవిష్యత్‌లో నష్టం జరగకుండా ముందస్తు అవగాహన ఏర్పాటు చేసుకోవాలని వ్యవసాయశాఖ, రైతులకు కేసీఆర్ సూచించారు. ఏటా మార్చి వరకే కోతలు పూర్తయ్యేలా ముందుగానే వరి నాటుకోవాలన్నారు. మార్చి తర్వాత అకాల వర్షాలుపడే అవకాశం ఉన్నందున.. ఆలోపే కోతలు పూర్తిచేసుకోవడం మంచిదని కేసీఆర్ అభిప్రాయపడ్డారు. ఏప్రిల్, మే వరకు నూర్పకుంటే ఎండలు ఎక్కువై ధాన్యంలో నూక శాతం పెరిగిపోతుందని పేర్కొన్నారు. మార్చిలోపే వరి కోతలు పూర్తయ్యేలా మరింత శాస్త్రీయ అధ్యయనం చేసి రైతులను చైతన్య పర్చాలని వ్యవసాయశాఖను ఆదేశించారు. రసాయనిక ఎరువుల వాడకంపైనా అవగాహన కల్పించాలని చెప్పారు.
"ప్రకృతి వైపరీత్యాలు, మారుతున్న కాలానికి అనుగుణంగా వ్యవసాయంలో వచ్చే మార్పులను ఎప్పటికప్పుడు అన్నదాతలకు అర్థమయ్యేలా.. అధికారులు చైతన్యం కల్పించాలి. కిందిస్థాయి ఏఈఓ, అధికారులు ఎప్పటికప్పుడు అప్రమత్తం కావాలి. రైతు వేదికలను ఉపయోగించుకొని.. వ్యవసాయాధికారులు క్షేత్రస్థాయిలో పనిచేయాలి. అధికారులు అలసత్వం వహిస్తే కఠిన చర్యలు తప్పవు. అత్యంత వేగంగా పురోగమిస్తున్న తెలంగాణలో.. వ్యవసాయాన్ని ఆదుకునే దిశగా వ్యవసాయశాఖ అప్రమత్తంగా ఉండాలని" సీఎం కేసీఆర్ తెలిపారు.
త్వరలో ధాన్యం సేకరణ పూర్తి చేస్తాం: కింది నుంచి పైస్థాయి అధికారులు, సిబ్బంది ఎప్పటికప్పుడు ప్రభుత్వవిధానాలు, లక్ష్యాలను అర్థం చేసుకుంటూ.. మరింత క్రియాశీలకంగా పనిచేయాల్సిన అవసరముందని ముఖ్యమంత్రి కేసీఆర్ స్పష్టం చేశారు. అకాల వర్షాలతో కొన్నిచోట్ల ధాన్యం సేకరణలో ఇబ్బందులు ఎదురవుతున్నాయని అధికారులు తెలిపారు. అయినా త్వరలోనే ధాన్యం సేకరణ పూర్తి చేస్తామని పౌరసరఫరాల శాఖ కమిషనర్ అనిల్ కుమార్ వివరించారు. నిరంతరం రైతులకు అందుబాటులో ఉండి తగు సూచనలు అందించేలా నిరంతరం పర్యవేక్షించాలని.. వ్యవసాయ శాఖ కార్యదర్శి రఘునందన్‌రావును ఆదేశించారు. అధికారుల పనితీరు పరిశీలనకు ఆకస్మిక తనిఖీలు చేపట్టాలని ప్రభుత్వ ప్రధాన కార్యదర్శి శాంతికుమారిని ఆదేశించారు.
ఇవీ చదవండి:
