దేశవ్యాప్తంగా నిలిచిపోయిన ఎయిర్​టెల్ సేవలు- ఆందోళనలో వినియోగదారులు!

ఎయిర్​టెల్ సేవల్లో అంతరాయం- అసహనం వ్యక్తం చేస్తున్న యూజర్లు!

Airtel Network Down Today: టెలికాం దిగ్గజం ఎయిర్​టెల్ సేవలకు నేడు అంతరాయం ఏర్పడింది. దేశవ్యాప్తంగా ఎయిర్​టెల్ నెట్​వర్క్​ మొబైల్, బ్రాడ్​బ్యాండ్ సేవలు ఒక్కసారిగా పడిపోయాయి. దీంతో వేలాదిమంది వినియోగదారులు తీవ్ర ఇబ్బందులను ఎదుర్కొంటున్నారు. గురువారం ఉదయం 10.30 గంటల సమయంలో ఎయిర్​టెల్ సేవల్లో అంతరాయం ఏర్పడిందని 2,800కి పైగా నివేదికలను Downdetector.in చూపించింది.

Airtel Broadband & Mobile Services All Are Down ,
No Network on Mobile & Boradband 😐😐😐😐
Everything is gone in Gujarat Right Now..!@airtelindia @Airtel_Presence @airtelnews #mobilenetwork #airtel #airtel5gsmartconnect #nowifi

— Jiten Kumar (@jitenpalkumar) December 26, 2024

దేశంలో రెండో అతిపెద్ద టెలికాం సర్వీస్ ప్రొవైడర్ అయిన ఎయిర్‌టెల్ నేడు నెట్‌వర్క్ సమస్యలను ఎదుర్కొంటోంది. నెట్​వర్క్ డౌన్ కారణంగా గందరగోళం నెలకొంది. దీంతో వేలాది మంది ఎయిర్‌టెల్ వినియోగదారులు కనెక్టివిటీ సమస్యలను ఎదుర్కొంటున్నారు. కాల్స్ చేయలేకపోతున్నామని, ఇంటర్నెట్​ యాక్సెస్ పొందలేకపోతున్నామని సోషల్ మీడియా ప్లాట్​ఫారమ్ 'X' వేదికగా ఫిర్యాదు చేశారు. మరికొంతమంది ఎయిర్‌టెల్ సిమ్‌లో నడుస్తున్న వారి డివైజ్ చాలా కాలంగా 'నో నెట్‌వర్క్' అని చూపిస్తుందని అసహనాన్ని వ్యక్తం చేశారు.

డౌన్​డెటెక్టర్ సమాచారం ప్రకారం.. దేశవ్యాప్తంగా 2,800 మందికి పైగా ఎయిర్​టెల్ వినియోగదారులు నెట్​వర్క్ ఔటేజ్ సమస్యను ఎదుర్కొంటున్నారు. వీరిలో 47శాతం మంది వినియోగదారులు మొబైల్ ఇంటర్నెట్ పనిచేయడం లేదని ఫిర్యాదు చేశారు. అయితే 30 శాతం మంది మాత్రం మొత్తం బ్లాక్‌అవుట్‌ని నివేదించారు. 23శాతం మంది వినియోగదారులు మొబైల్ సిగ్నల్ గురించి ఫిర్యాదు చేశారు. సోషల్ మీడియా ప్లాట్​ఫారమ్ 'X'లో చేసిన పోస్ట్​ల ప్రకారం.. ఎయిర్‌టెల్ అంతరాయం గుజరాత్‌లోని వినియోగదారులను ఎక్కువగా ప్రభావితం చేసింది.

అహ్మదాబాద్​లో యూజర్లు కూడా పెద్ద ఎత్తున ఈ సమస్యను ఎదుర్కొంటున్నట్లు తెలుస్తోంది. ఓ వినియోగదారుడు 'X' లో చేసిన పోస్ట్​లో తనతో పాటు ఎవరైనా ఎయిర్‌టెల్ నెట్‌వర్క్‌తో సమస్యలను ఎదుర్కొంటున్నారా అని అడిగారు. దీనిపై స్పందించిన కొంతమంది ఎయిర్‌టెల్ కస్టమర్లు తమకు కూడా నెట్‌వర్క్ లభించడం లేదని కామెంట్లు పెట్టారు. మరో వినియోగదారుడు ఎయిర్‌టెల్ బ్రాడ్‌బ్యాండ్, మొబైల్ సేవలు డౌన్‌లో ఉన్నాయని, తన డివైజ్​లలో నెట్‌వర్క్ లేదని బదులిచ్చారు. అయితే దీనిపై ఎయిర్‌టెల్ మాత్రం ఇంతవరకూ స్పందిచలేదు. నెట్​వర్క్ డౌన్​ సమస్యకు గల కారణాలపై ఎలాంటి ప్రకటనా చేయలేదు.