Chandrababu Naidu Arrest : చంద్రబాబుకు అనారోగ్యం.. అయినా ఆగని అరెస్టు.. జగన్‌ సైకో పాలనపై నిరసనలు

Chandrababu Naidu Arrest : : అరెస్టుకు ముందు చంద్రబాబుకు నిర్వహించిన వైద్య పరీక్షల్లో ఆయనకు హైబీపీ, షుగర్‌ ఉందని తేలింది. అయినా పోలీసులు మాత్రం అవేవీ పట్టించుకోకుండా అరెస్టు కొనసాగించారు. చంద్రబాబునాయుడు అనారోగ్యంతో ఉన్నారన్న విషయాన్ని పట్టించుకోవాలని ఆయన తరుపు న్యాయవాదులు పోలీసులకు తెలిపారు. అనార్యోగాన్ని సైతం పట్టించుకోకపోటంతో చంద్రబాబు తరుఫు న్యాయవాదులు హైకోర్టులో బెయిల్‌కు ప్రయత్నాలు చేస్తున్నారు. బాబుకు సంబంధం లేని కేసుతో, లేనిపోని సెక్షన్లు బనాయించి అరెస్టు చేయడాన్ని అటు తెలుగుదేశం పార్టీ శ్రేణులు జీర్ణించుకోవటం లేదు.

Chandrababu Naidu Arrest : టీడీపీ అధినేత చంద్రబాబు బస చేసిన ప్రాంతానికి అర్ధరాత్రి నుంచే పోలీసులు వ్యూహాత్మకంగా చేరుకున్నారు. అరెస్టులో భాగంగా రాత్రే అనంతపురం నుంచి బలగాలను నంద్యాలకు రప్పించారు. చంద్రబాబు కార్వాన్ చుట్టూ రోప్ పార్టీని ఏర్పాటు చేశారు. తమ చర్యలకు అడ్డంకులు లేకుండా చేసుకున్న పోలీసులు అడ్డుపెట్టిన తెలుగుదేశం వాహనాలను జేసీబీతో తొలగించారు. తెలుగుదేశం పార్టీ కార్యకర్తలను, మీడియా బృందాలను బయటకు పంపారు. చంద్రబాబు బస్సు వద్ద ఉన్న నాయకులను అదుపులోకి తీసుకొని.. పోలీసు వాహనాల్లో తరలించారు. కాలవ శ్రీనివాసులు, భూమా బ్రహ్మానందరెడ్డి, ఎ.వి.సుబ్బారెడ్డి, బి.సి.జనార్దన్‌రెడ్డి, అఖిలప్రియ, ఇతర నేతలను అరెస్టు చేశారు.

Chandrababu Naidu Arrest Updates : తెల్లవారుజామున రెండున్నర గంటల ప్రాంతంలో.. అనంతపురం డీఐజీ రఘురామిరెడ్డి నేతృత్వంలో పోలీసులు చంద్రబాబు ఉన్న చోటుకి చేరుకున్నారు. చంద్రబాబును కలవాలంటూ ఎన్​ఎస్​జీ సిబ్బందిని రఘురామిరెడ్డి కోరారు. ఈ సమయంలో కలవాల్సిన పనేంటని పక్కనే ఉన్న తెలుగుదేశం నాయకులు డీఐజీని ప్రశ్నించారు. మీకెందుకు చెప్పాలంటూ రఘురామిరెడ్డి టీడీపీని నాయకులు ఎదురు ప్రశ్నించారు. ఈ కేసుతో మీకేం సంబంధం అంటూ అలానే వాదించారు. అసలు కేసేంటో చెప్పాలంటూ తెలుగుదేశం నేతలు రఘురామిరెడ్డిని నిలదీశారు.

EX CM Chandrababu Naidu Detained : కేసు వివరాలపై నోరు మెదపని డీఐజీ రఘురామిరెడ్డి చంద్రబాబు బస చేసిన బస్సు తలుపుల వద్దకు దూసుకెళ్లారు. వారి తీరుపై తెలుగుదేశం నాయకులు మండిపడ్డారు. విషయమేంటో చెప్పకుండా ఎందుకు హడావుడి చేస్తున్నారని నిలదీశారు. మీడియా ప్రతినిధులు ప్రశ్నించినా రఘురామిరె‌డ్డి ఎదురుదాడి చేయడం తప్ప సమాధానం ఇవ్వలేదు.

తెలుగుదేశం నాయకుల మధ్య సుదీర్ఘంగా వాగ్వాదం : ఈ క్రమంలో డీఐజీ రఘురామిరెడ్డి, తెలుగుదేశం నాయకుల మధ్య సుదీర్ఘంగా వాగ్వాదం సాగింది. కేసు గురించి చెప్పకుండా అర్ధరాత్రులు ఇల రావడం సరికాదన్నారు. తెల్లవారుజామున చంద్రబాబు కాన్వాయ్‌ కదులుతుందనే సమాచారం వచ్చిందని, అందుకే వచ్చామని.. రఘురామిరెడ్డి చెప్పారు. అసలు అలాంటిదేమీ లేదని తెలుగుదేశం నేతలు స్పష్టం చేసినా డీఐడీ వెనక్కి తగ్గలేదు. మరోవైపు... ప్రోటొకాల్ ప్రకారం ఉదయం 5.30 గంటల వరకూ వీఐపీని కలిసేందుకు అనుమతి ఇవ్వబోమని ఎన్​ఎస్​జీ సిబ్బంది డీఐజీ రఘురామిరెడ్డితో తేల్చిచెప్పారు. ఉదయం 5.30 నిమిషాల తర్వాత.. వైద్య పరీక్షలు నిర్వహించి.. ఆ నివేదికను అధికారులకు పంపి అక్కడి నుంచి వచ్చే ఆదేశాల ప్రకారం చంద్రబాబు వద్దకు పంపుతామని ఎన్​ఎస్​జీ కామాండెంట్ స్పష్టం చేశారు.