Kishan Reddy Comments: 'దేశంలో అందరికీ అందాకే... మిగతా దేశాలకు సరఫరా చేస్తాం'

దేశంలో 12 నుంచి 18 సంవత్సరాల పిల్లలకు కూడా కొవిడ్ టీకా ఇవ్వాలని కేంద్రం నిర్ణయించినట్లు కేంద్ర మంత్రి కిషన్ రెడ్డి (Kishan Reddy Comments) తెలిపారు. వచ్చే దసరా నాటికి అందరికీ వ్యాక్సిన్ ఇవ్వనున్నట్లు పేర్కొన్నారు. సుమారు 160 దేశాలు కొవిడ్ టీకా కోసం దరఖాస్తు పెట్టుకున్నట్లు కిషన్ రెడ్డి తెలిపారు. దేశంలో టీకా పూర్తిస్థాయిలో ప్రజలకు అందిన తర్వాతే ఇతర దేశాలకు ఎగుమతి చేస్తామని తెలిపారు. హైదరాబాద్​లో పర్యటించిన ఆయన అంబర్​పేటలో పలు అభివృద్ధి కార్యక్రమాల్లో పాల్గొన్నారు.

కేంద్ర సాంస్కృతిక శాఖ మంత్రి కిషన్ రెడ్డి (Kishan Reddy Comments) హైదరాబాద్​లో పర్యటించారు. అంబర్​పేటలో పలు అభివృద్ధి కార్యక్రమాలకు శంకుస్థాపన చేసిన ఆయన... భారీ వర్షాల నిమిత్తం ప్రజలు అప్రమత్తంగా ఉండాలని సూచించారు. ఈ కార్యక్రమంలో స్థానిక ఎమ్మెల్యే కాలేరు వెంకటేశ్​, గోల్నాక డివిజన్ కార్పొరేటర్ దూసరి లావణ్య శ్రీనివాస్ గౌడ్, బాగ్ అంబర్​పేట డివిజన్ కార్పొరేటర్ పద్మా వెంకట్ రెడ్డి.. పోచమ్మ బస్తీలో నూతనంగా ఏర్పాటు చేసిన కమిటీ హాల్​ను ప్రారంభించారు. జీహెచ్ఎంసీ కమిషనర్, అధికారులతో అత్యవసర సమావేశం ఏర్పాటు చేసి భారీగా కురుస్తున్న వర్షాలకు లోతట్టు ప్రాంత ప్రజల యోగక్షేమాలను తెలుసుకుంటానని కిషన్ రెడ్డి అన్నారు.

అనంతరం నవరాత్రి వేడుకలను పురస్కరించుకొని కార్వాన్ దర్బార్ మైసమ్మ దేవాలయాన్ని సందర్శించారు. అమ్మవారి ఆశీస్సులు తీసుకున్న అనంతరం అక్కడ ఏర్పాటు చేసిన అన్నదాన కార్యక్రమంలో పాల్గొన్నారు. కొవిడ్ మహమ్మారిని ప్రజలు అంతా ఏకతాటిపై ఉండి తరిమికొట్టాలని కిషన్​రెడ్డి (Kishan Reddy Comments) తెలిపారు. ఈ దసరా వరకు వందకోట్ల టీకాల మైలురాయిని భారత ప్రభుత్వం చేరుకుంటుందని ధీమా వ్యక్తం చేశారు.

ముందుగా అందరికి బతుకమ్మ పండుగ శుభాకాంక్షలు. కొద్దిగా ఆలస్యమైనా పండుగ రోజు అందరి సహకారంతో ఇవాళ పోచమ్మబస్తీలో కమ్యూనిటీ హాల్​ ప్రారంభం చేసుకున్నాం. రానున్న రోజుల్లో ఈ కమ్యూనిటీ హాల్​ను బస్తీలో ఉన్న పెద్దలు, మహిళలు అందరూ సద్వినియోగం చేసుకోవాలని కోరుతున్నా.

-- కిషన్ రెడ్డి, కేంద్రమంత్రి

ఇదీ చదవండి: Petrol Diesel Hike: పండుగ వేళ సామాన్యుడిపై ధరల పోటు