రాష్ట్రంలో 2 టోల్​ప్లాజాల్లో మరో నెలపాటు హైబ్రిడ్​ వరసలు

దేశంలో  టోల్‌ప్లాజాల  వద్ద  ఫాస్టాగ్‌తో  చెల్లింపులు  పెంచేందుకు కేంద్రం కీలక నిర్ణయం తీసుకుంది. నగదు చెల్లింపులు చేస్తే రాయితీలు లభించవని స్పష్టంచేసింది. టోల్‌ప్లాజా పరిసరాల్లోని స్థానికులకు ఆ నిబంధననే వర్తిస్తుందని పేర్కొంది. రాష్ట్రంలో రెండు టోల్‌ ప్లాజాల్లో  మరో  నెలపాటు  రెండు  హైబ్రీడ్‌  వరస  రహదారులు ఏర్పాటుకు అనుమతిస్తూ కేంద్ర జాతీయ రహదారుల సంస్థ ఉత్తర్వులు జారీచేసింది.

డిజిటల్‌ చెల్లింపులను ప్రోత్సహించేందుకు అనువుగా నగదు చెల్లింపుదారులపై కేంద్రప్రభుత్వం కొరఢా ఝళిపించింది. వెళ్లిన మార్గంలో 24 గంటల్లో తిరిగివస్తే.. టోల్‌ట్యాక్స్‌లో తిరుగుప్రయాణానికి ప్రస్తుతం 50 శాతం రాయితీ ఇస్తున్నారు. ఇకపై ఆ రాయితీ పొందాలంటే ఆ వాహనానికి ఫాస్టాగ్‌ ఉండి తీరాల్సిందేనని, టోల్​ టాక్స్‌ను నగదు రూపంలో చెల్లించేవారికి రాయితీ వర్తించదని.. కేంద్ర జాతీయ రహదారుల సంస్థ ఉత్తర్వులు జారీచేసింది. బుధవారం నుంచి ఆ నిబంధనలు.. అమల్లోకి వచ్చినట్లు అధికారులు తెలిపారు. టోల్‌ప్లాజా పరిసరాల్లో ఉన్న వారికి జారీ చేస్తున్న నెలవారీ పాసులు, ఇతర రాయితీ వర్తించాలంటే తప్పనిసరిగా ఫాస్టాగ్‌ ఉండాల్సిందేనని కేంద్రం స్పష్టం చేసింది. నగదు లేదా క్రెడిట్‌, డెబిట్‌ కార్డుల ద్వారా చెల్లింపులు చేసే వారిని డిజిటల్‌ చెల్లింపుల వైపు మళ్లించేందుకు కేంద్రం ఆ నిర్ణయం తీసుకుంది.

65 టోల్​ప్లాజాల్లో..

గత నెల15 నుంచి.. దేశవ్యాప్తంగా టోల్‌ చెల్లింపులను ఎలక్ట్రానిక్‌ పద్ధతుల్లో వసూలు చేసే విధానాన్ని చేపట్టారు. దేశవ్యాప్తంగా 65 టోల్‌ప్లాజాల పరిధిలో నగదు వసూళ్లు అధికంగా ఉన్నట్లు కేంద్రం గుర్తించింది. ఆ మార్గాల్లో వాహనదారులకు అసౌకర్యం లేకుండా.. నెలపాటు హైబ్రీడ్‌ వరసలకు అనుమతినిచ్చింది.

రాష్ట్రంలో రెండింటికి..

రాష్ట్రంలోని హైదరాబాద్‌- విజయవాడ హైవేపై పంతంగి, హైదరాబాద్‌- బెంగళూరు హైవేపై ఉన్న రాయికల్‌ టోల్‌ప్లాజాల వద్ద మరో నెల పాటు హైబ్రీడ్‌ వరుసలుగా అనుమతిస్తూ.. కేంద్రం ఉత్తర్వులిచ్చింది. మిగిలిన 75 శాతం వరసలను ఫాస్టాగ్‌ కోసం కేటాయించాలని తెలిపింది. రాష్ట్రంలోని మిగిలిన 16 టోల్‌ప్లాజాల వద్ద నగదు కోసం ఒక్క వరుస మాత్రమే అనుమతించారు. నెల గడవు తీరాక లేదా పండగ రద్దీ తగ్గిందని భావించిన తరుణంలో ఆ రెండు మార్గాల్లో నగదు కోసం ఒక్కవైపు ఒక్కో వరసను ఏర్పాటు చేయవచ్చని ఉత్తర్వుల్లో కేంద్ర ప్రభుత్వం స్పష్టంచేసింది.

ఇవీ చూడండి: తెరాస 'పుర' అభ్యర్థులతో మంత్రి కేటీఆర్​ టెలీకాన్ఫరెన్స్