బల్దియా ఎన్నికల వేళ... రాష్ట్ర భాజపాలోకి ఇతర పార్టీ నేతల చేరికలపై ప్రచారం కొనసాగుతోంది. ఇప్పటికే పలువురు కాంగ్రెస్‌ కీలక నేతలను కలిసిన కమలం పార్టీ నేతలు.. తాజాగా శాసన మండలి మాజీ ఛైర్మన్‌, తెరాస నేత స్వామిగౌడ్‌ను కలిశారు. కేంద్ర మంత్రి కిషన్‌రెడ్డి, పార్టీ రాష్ట్ర అధ్యక్షుడు బండి సంజయ్, సీనియర్‌ నేతలు లక్ష్మణ్, చింతల రామచందార్రెడ్డి... బంజారాహిల్స్‌లోని ఓ భాజపా కార్యకర్త ఇంట్లో స్వామిగౌడ్‌ను కలిశారు.
స్వామి గౌడ్ మొదటి నుంచి హిందు భావజాలం కలిగిన వ్యక్తని, ఆర్ఎస్ఎస్తో అనుంబంధం ఉందని బండి సంజయ్ అన్నారు. ఆయనను మర్యాదపూర్వకంగా కలిసినట్లు చెప్పుకొచ్చారు. తెరాస పాలనలో ఉద్యమకారులకు న్యాయం జరగకపోవటంతో బయటకి వస్తున్నారని సంజయ్ అన్నారు.
రాజకీయ చర్చలు జరిగింది వాస్తవమేనని... త్వరలోనే భేటీ వివరాలు వెల్లడిస్తామని లక్ష్మణ్ తెలిపారు. తాను స్నేహపూర్వకంగానే వారిని కలిసినట్లు స్వామిగౌడ్ చెప్పారు. కాగా... గత కొన్నాళ్లుగా తెరాస కార్యక్రమాలకు స్వామిగౌడ్ దూరంగా ఉంటున్నారు. ఇటీవల రేవంత్‌రెడ్డితో కలిసి ఓ కార్యక్రమంలో పాల్గొన్న ఆయన... తెరాస పట్ల అసంతృప్తిని వ్యక్తం చేశారు. ఈ నేపథ్యంలో ఆయన భాజపా నేతలతో భేటీ కావటం ప్రాధాన్యతను సంతరించుకుంది.
ఇదీ చదవండి: సైకిల్ తొక్కి కార్యకర్తల్లో ఉత్సాహం నింపిన బండి సంజయ్
