బీజేపీ రాష్ట్ర అధ్యక్షుడు బండి సంజయ్ కుమారుడు బండి భగీరథ న్యాయవాదితో కలిసి పోలీస్ స్టేషన్కు వెళ్లారు. తనపై నమోదైన కేసు విషయంలో స్టేషన్లో ఆయన హాజరయ్యారు. బండి భగీరథపై దుండిగల్ పీఎస్‌లో కేసు నమోదైందని.. ఈ విషయం సామాజిక మాధ్యమాల ద్వారా తమకు తెలిసిందని బండి భగీరథ తరఫు న్యాయవాది కరుణసాగర్‌ చెప్పారు. కేసు విషయాన్ని నిర్ధారించుకునేందుకు ఇక్కడికి వచ్చామని తెలిపారు. కేసు ప్రాథమిక దశలోనే ఉందని పోలీసులు చెప్పారని ఆయన పేర్కొన్నారు. ఆధారాలు సేకరించిన తర్వాత.. పిలుస్తామని చెప్పినట్లు తెలిపారు. విచారణలో పోలీసులకు పూర్తిగా సహకరిస్తామని కరుణసాగర్‌ వెల్లడించారు.
తమ మధ్య అభిప్రాయ భేదాలు సృష్టించేందుకే: బండి భగీరథ మహీంద్ర వర్సిటీలో మేనేజ్మెంట్ కోర్సు చదువుతున్నారు. ఈ క్రమంలోనే కొద్ది రోజుల క్రితం శ్రీరామ్ అనే విద్యార్థిని దూషిస్తూ దాడి చేశాడు. ఈ వీడియో సోషల్ మీడియాలో వైరల్గా మారింది. దీనిపై విశ్వ విద్యాలయ క్రమశిక్షణా సంఘం ప్రతినిధులు బండి భగీరథపై పోలీసులకు ఫిర్యాదు చేశారు. దీని ఆధారంగా దుండిగల్ పోలీసులు బండి భగీరథ పలు సెక్షన్ల కింద నిన్న కేసు నమోదు చేశారు. ఇందులో భాగంగానే బాధిత విద్యార్థి వీడియో సైతం బయటికి వచ్చింది. భగీరథ తనకు మిత్రుడేనని.. తాము ఇరువురు స్నేహంగానే ఉన్నామంటూ ఓ వీడియో విడుదల చేశాడు. తమ మధ్య అభిప్రాయ భేదాలు సృష్టించేందుకే దాడికి సంబంధించిన వీడియోను బహిర్గతం చేశారని పేర్కొన్నాడు.
సీఎం కేసీఆర్‌కు దమ్ముంటే తనతో రాజకీయం చేయాలి: తన కుమారుడిపై నమోదైన కేసు విషయంపై బండి సంజయ్ స్పందించారు. సీఎం కేసీఆర్‌కు దమ్ముంటే తనతో రాజకీయం చేయాలని పేర్కొన్నారు. అలా చేయడం చేతగాక తట్టుకోలేక.. తన కుమారుడిని లాగుతున్నారని తెలిపారు. కేసీఆర్ మనవడి విషయంలో కొందరు తప్పు వ్యాఖ్యలు చేస్తే తాను ఖండించానని బండి సంజయ్ గుర్తు చేశారు.
