తెరాస ప్రభుత్వం ఎస్సీ, ఎస్టీ వ్యతిరేక ప్రభుత్వమని.. కేసీఆర్ ఎస్సీఎస్టీ ద్రోహి అని భాజపా రాష్ట్ర అధ్యక్షుడు బండి సంజయ్ వ్యాఖ్యానించారు. భూపాలపల్లి జిల్లా మల్లారంలో యువకుని హత్య గురించి తెలుసుకోవడానికి వెళ్లిన భాజపా ప్రతినిధి బృందాన్ని దారి మధ్యలోనే పోలీసులు అరెస్ట్ చేయడాన్ని తీవ్రంగా ఖండించారు.
రేవెల్లి రాజబాబు అనే యువకుడిని తన కుటుంబ సభ్యుల ముందే అరాచకంగా కొట్టి చంపడం హేయమైన చర్యని.. ప్రజాస్వామ్య వ్యవస్థలో ఇలాంటి వాటికి స్థానం లేదని ఓ ప్రకటనలో పేర్కొన్నారు.
హత్య వెనక అధికార పార్టీ నాయకులు ఉన్నారని కుటుంబ సభ్యులు ఆరోపిస్తుంటే... నిందితులపై ఇప్పటివరకు ఎందుకు చర్యలు తీసుకోలేదని బండి సంజయ్ ప్రశ్నించారు. రాజబాబు కుటుంబానికి భరోసా కల్పించాల్సిన పోలీసులు బెదిరింపులకు గురి చేయడం నీతిమాలిన చర్యని మండిపడ్డారు.
మల్లక్కపేటలో ఓ యువతిపై ఎంఐఎం గుండాలు అత్యాచారం చేసినా చర్యలు తీసుకోలేదని దుయ్యబట్టారు. రాష్ట్రంలో అనేక ప్రాంతాల్లో వివిధ సంఘటనల్లో దళితులను అణగదొక్కాలని కక్షపూరితంగా వ్యవహరిస్తున్నారని ఆరోపించారు.
