భద్రాద్రి రామయ్య సన్నిధిలో ఆన్లైన్ టికెట్ విషయంలో వివాదం చోటుచేసుకుంది. ప్రధాన ఆలయంలోని లక్ష్మణ సమేత సీతారాములకు ప్రతి ఆదివారం పంచామృతాలతో అభిషేకం నిర్వహిస్తారు. ఈ అభిషేకానికి ఒక్క జంటకు 1,100 రూపాయలు దేవస్థానం కేటాయించింది.
హైదరాబాద్కు చెందిన భక్తులు గత నెల 20న అభిషేకానికి ఆన్లైన్లో టికెట్ బుక్ చేసుకున్నారు. ఈరోజు ఉదయం నాలుగు గంటలకు క్యూలైన్ వద్దకు వచ్చి దర్శనానికి వెళ్తుండగా ఆలయ సిబ్బంది ఆన్లైన్ టికెట్లు చెల్లవని ఆపివేశారు.
గంటసేపు వేచి ఉన్న అనంతరం ప్రధాన ఆలయం లోనికి అనుమతించారు. వేలు ఖర్చు పెట్టి, నెల రోజుల ముందే టికెట్ బుక్ చేసుకుంటే ఆలయ అధికారులు అనుమతించలేదని భక్తులు ఆవేదన వ్యక్తం చేశారు.
టికెట్లు నేరుగానే విక్రయిస్తున్నామని, ఆన్లైన్లో విక్రయించడం లేదని ఆలయ ఈవో నరసింహులు స్పష్టం చేశారు. భద్రాచల దేవస్థానానికి సంబంధించి టీ-యాప్లో ఆన్లైన్ టికెట్లు విక్రయిస్తున్నారనే విషయం తమకు తెలియదని, దీనిపై విచారణ చేసి త్వరలో వివరాలు తెలుపుతామన్నారు.
- ఇవీ చూడండి: నర్మదా నదిలో ఐసీడీఎస్ ఉద్యోగి గల్లంతు
