ఎడతెరిపిలేని వర్షాలతో భద్రాద్రి కొత్తగూడెం జిల్లా మన్యం ప్రాతం తడిసి ముద్దయింది. వాగులు, వంకలు పొంగి పొర్లుతున్నాయి. గుంపునకు గుంపునకు మధ్య అందంగా కనిపించే వాగులు ఉగ్రరూపం దాల్చి రాకపోకలు నిలిపేశాయి. నాలుగురోజులుగా కురుస్తున్న భారీ వర్షాలతో గుండాల మండలం పూర్తిగా వరద గుప్పిట్లో చిక్కుకుపోయింది. రెండురోజుల కిందట మండల కేంద్రానికి వెళ్లిన ప్రజలు... ఇళ్లకు చేరుకునేందుకు పడుతున్న తిప్పలు ప్రాణంతో చెలగాటంలా ఉన్నాయి. ఉద్ధృతంగా ప్రవహిస్తున్న మల్లన్నవాగు దాటేందుకు ప్రజలు చేసిన సాహసోపేత ప్రయత్నం...ఏజెన్సీ ప్రజల రవాణా కష్టాలకు సాక్ష్యంగా నిలుస్తోంది.
వరి నాట్ల సీజన్ కావడం వల్ల సమీప గ్రామాల నుంచి ప్రజలు మండల కేంద్రానికి... యూరియా, ఇతర ఎరువుల కోసం వెళ్లారు. కానీ తిరుగొచ్చేసరికి పొందుతున్న వాగు వారిని అవతలిఒడ్డునే నిలిపేసింది. ఒకటిన్నర రోజులు ఎదురుచూసి చేసేదేమీ లేక వాగు ఒడ్డుకి తాడు కట్టుకుని ప్రమాదపుటంచున ప్రయాణం చేస్తున్నారు.
తల్లడిల్లిన పసికందు
నాగారం గ్రామానికి చెందిన జోగా శోభారాణి శుక్రవారం ఉదయం యూరియా కోసం మండల కేంద్రంలోని సొసైటీకి వెళ్లింది. తిరుగొచ్చేసరికి మలన్న వాగు ఉద్ధృతి భారీగా పెరగింది. వాగు దాటలేని పరిస్థితిలో ఒకటిన్నర రోజుల నుంచి అవతలి ఒడ్డునే ఉండిపోయింది. తల్లి కోసం పది నెలల చిన్నారి గుక్క పట్టి ఏడుస్తుండటంతో చలించిన గ్రామస్థులు ఆమెను తాళ్ల సాయంతో వాగు దాటించారు. కొడవటంచ, నాగారం, సాయనపల్లి గ్రామాలకు వెళ్లాల్సిన స్థానికులు కూడా తాళ్ల సాయంతో వాగు దాటారు.
ఇదీ చూడండి: వర్షాలు, వరదలపై సీఎం కేసీఆర్‌ ఆరా
